«Հանդիպման վայրը գրադարանն է» խորագրի ներքո Գրադարանավարի օրվան նվիրված մի շարք մշակութային միջոցառումներ կանցկացվեն հոկտեմբերի 7-ին մայրաքաղաքում և Հայաստանի մարզերում, ասաց ՀՀ մշակույթի փոխնախարար Արև Սամուելյանը։
«2004թ.-ից հոկտեմբերի 7-ը Հայաստանում որպես Գրադարանավարի օր են տոնում։ Այս տարվանից սկսած՝ մենք այս միջոցառումը ներառել ենք հայկական տպագրության 500-ամյակին նվիրված միջոցառումների շարքում, որոնք կտոնվեն 2012թ.-ին»,- չորեքշաբթի լրագրողներին ասաց Սամուելյանը։
Ըստ ՀՀ փոխնախարարի, միջոցառումները տեղի կունենան ոչ միայն գրադարաններում, որոնք գտնվում են ՀՀ մշակույթի նախարարության հովանու ներքո, այլ նաև հանրապետության բոլոր շրջանային և մարզային գրադարաններում։
Սամուելյանը նշեց, որ միջոցառումները կընդգծեն ժամանակակից տեխնոլոգիաների դարաշրջանում գրքի և ընթերցանության կարևորությունը։
Նա ընդգծեց, որ միջոցառումները մեկնարկում են Մշակույթի նախարարությունում՝ գրադարանային ոլորտում զգալի փորձ և հեղինակություն ունեցող մի քանի մասնագետներին ոսկե մեդալներ շնորհելու արարողությամբ։
Մշակույթի փոխնախարարն ընդգծեց, որ խոշոր միջոցառում տեղի կունենա Ազգային գրադարանում, իսկ հանրապետության բոլոր գրադարաններն այդ օրը բաց կլինեն մինչև ժամը 22։00-ը։
ՀՀ մշակույթի նախարարության աշխատակազմի մշակութային ժառանգության վարչության գլխավոր մասնագետ Լուիզա Բերբերյանն իր հերթին նշեց, որ այդ օրը հանրապետության բոլոր մայրաքաղաքային, շրջանային և մարզային գրադարաններում բանավեճ-սեմինարներ, ցուցահանդես-վաճառքներ, հեքիաթների բեմադրություններ, լավագույն ընթերցողների գեղանկարչական ցուցահանդես- մրցույթներ, հրատարակիչների, գրողների և արվեստագետների հետ հանդիպումներ կանցկացվեն։
Այսօրվա դրությամբ Հայաստանում 2 500 գրադարան է գործում։ -0-
