ԵՐԵՎԱՆ, 6 հոկտեմբերի. /Նովոստի-Արմենիա/. Բելառուսը ԵԱՀԿ Մինսկի խմբի համար այլընտրանք չի տեսնում ղարաբաղյան կարգավորման գործում, չորեքշաբթի լրագրողներին հայտնեց Հայաստանում Բելառուսի դեսպան Ստեփան Սուխարենկոն:
«Իր գործունեության ընթացքում ԵԱՀԿ Մինսկի խումբն ապացուցել է իր արդյունավետությունը, և մենք կարծում ենք, որ Լեռնային Ղարաբաղի հարցի լուծումը պետք է իրականացնել հենց այդ ձևաչափով»,- ասաց դեսպանը:
Խոսելով ադրբեջանական ԶԼՄ-ներում արծարծվող այն հայտարարությունների մասին, որ Բելառուսը սատարում է Ադրբեջանի տարածքային ամբողջականության գաղափարը, Սուխարենկոն ասաց, որ այդ թեմայով շահարկումները բավականին հաճախ են հանդիպում:
«Մենք այս խնդրի խաղաղ և համապարփակ լուծման կողմնակից ենք բոլոր երեք սկզբունքների՝ տարածքային ամբողջականության, ազգի ինքնորոշման իրավունքի և այս հարցի խաղաղ կարգավորման հիման վրա, բնականաբար, տվյալ իրավիճակում երկու կողմերի շահերի պահպանմամբ»,- ասաց դեսպանը, հավելելով, որ Մինսկն ինչ որ մեկի կողմը չէ:
Խոսելով ղարաբաղյան հակամարտության գոտում պատերազմի վերսկսման դեպքում Բելառուսի գործողությունների մասին՝ նա նշեց, որ որոշումը ոչ միայն Մինսկից կախված կլինի:
«Դուք լավ գիտեք, որ գոյություն ունի ռազմաքաղաքական կազմակերպություն՝ ՀԱՊԿ, գոյություն ունի ՀԱՊԿ պետությունների ղեկավարների խորհուրդ, որը որևէ կոնկրետ պետության նկատմամբ ագրեսիայի առաջացման դեպքում ընդհանուր, միացյալ դիրքորոշում կմշակի: Ես կարծում եմ, որ Բելառուսն այդ դեպքում կմասնակցի այդ գործընթացին ամբողջ ծավալով»,- ասաց Սուխարենկոն:
Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ. դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:
Դրան հետևեցին Ադրբեջանի ձեռնարկած լայնածավալ ռազմական գործողությունները, որոնք հանգեցրին նրան, որ նրանք կորցրեցին վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:
1994թ. մայիսի 12-ին զինադադարի վերաբերյալ եռակողմ համաձայնագրի կնքումից հետո հակամարտության գոտում դադարեցին ռազմական գործողությունները, որոնց արդյունքում երկու կողմից էլ եղավ շուրջ 25-30 հազար զոհ և մոտ մեկ միլիոն մարդ ստիպված լքեց բնօրրանը:
Հրադադարի ռեժիմ հաստատելու վերաբերյալ համաձայնագիրը մինչև այսօր ուժի մեջ է: 1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան: -0-
