Չորեքշաբթի ՀՀ կառավարության խորհրդակցության ժամանակ, որը վարել է վարչապետ Տիգրան Սարգսյանը, քննարկվել է Հայաստանում սերմնաբուծության զարգացման ծրագրի իրականացման գործընթացը և թե ինչպես է բաշխվել ՌԴ-ից ներմուծված սերմը, հաղորդում է կառավարության մամուլի ծառայությունը։
Խորհրդակցությանը մասնակցել են գյուղատնտեսության նախարարը, ՀՀ մարզպետները, պաշտոնատար այլ անձինք։ Ներկա են եղել նաև Ռուսաստանի Դաշնության «Սեմենա» ասոցիացիայի նախագահ Իվան Կուզմինն ու «Սեմենա Ստավրոպոլյա» ՍՊԸ-ի տնօրեն Գրիգորի Դոնցովը, ովքեր կարևոր դեր են ունեցել ՌԴ-ից սերմերի ներկրումը ժամանակին ապահովելու գործում։
Հոկտեմբերի 1-ին Ռուսաստանից 1010 տոննա ցորենի սերմ է ներմուծվել Հայաստան, որոնք կտարածվեն 95-100 խոշոր ֆերմերական գյուղտնտեսությունների միջև։ Մյուս տարի ֆերմերները պետք է վերադարձնեն ցորենը կառավարությանը՝ մեկը երկուսի հատուցմամբ։
«Խորհրդակցության նպատակն է վերհանել առկա խնդիրները և հասկանալ մարզերում ստեղծված իրավիճակը` ինչպես է բաշխվել ՌԴ-ից ներմուծված սերմը»,- հայտնեց վարչապետը։
Անդրադառնալով սերմնաբուծության ծրագրի իրականացմանն առնչվող հիմնական հարցադրումներին և խոսելով ՀՀ կառավարության հաստատած ռազմավարության առաջնահերթություններից` Տիգրան Սարգսյանը մասնավորապես նշել է, որ այս ծրագիրը գյուղատնտեսական ֆերմաներին օգնության ծրագիր չէ, այլ սերմնաբուծության վերականգնման ծրագիր է։
«Այսինքն` մենք պետք է գործ ունենանք այն տնտեսությունների հետ, որոնք երկարաժամկետ համագործակցելու են պետության հետ և մասնագիտանալու են սերմնաբուծության բնագավառում։ Սա նշանակում է` մարդիկ պետք է հետևեն հողի որակին, բոլոր տեխնիկական պահանջները կատարեն, իրենց մասնագիտական կարողություններն ավելացնեն ու մշտական վերահսկողության ներքո լինեն մեր սերմնաբուծական ֆերմաների կողմից»,- ընդգծեց պետության ղեկավարը։ Ըստ նրա, այդ համագործակցության շնորհիվ նախատեսվում է հասնել ՀՀ պահանջարկը բավարարելու համար մատնանշված տարեկան 30.000 տոննա սերմ արտադրելու թիրախային ցուցանիշին։
Այնուհետև գյուղատնտեսության նախարարի և մարզպետների կողմից ներկայացվել են տվյալներ մարզերում սերմնացուի բաշխման ու պայմանագրի կնքման հայտ ներկայացրած ֆերմերների թվի վերաբերյալ։
Գյուղատնտեսության նախարարը տեղեկացրել է, որ ՌԴ-ից ժամանած հյուրերն այսօր Հայաստանի պետական ագրարային համալսարանում անցկացնելու են սեմինար ֆերմերների և սերմնաբուծարանների աշխատակիցների համար` նվիրված ՌԴ-ից ներկրված սերմի տեխնոլոգիական ճիշտ օգտագործմանը։
Այդ համատեքստում վարչապետը կարևորել է նման սեմինարների կազմակերպումը` նպատակաուղղված ֆերմերներին համապատասխան տեղեկատվության տրամադրմանը։
Խորհրդակցության ժամանակ քննարկվել են նաև տեղական օրգանիկ պարարտանյութերի փորձարկման փորձնական ծրագրի մանրամասները։ Տիգրան Սարգսյանն ընդգծել է, որ դա կնպաստի տեղական արտադրանքի պահանջարկի մեծացմանը և հանձնարարել է մարզպետներին անձնական հսկողություն սահմանել ծրագրի նկատմամբ։
Հայաստանի սերմնաբուծության զարգացման ծրագիրը 2010-2012թթ.-ի ժամանակահատվածում էլիտար տեսակի ցորենի սերմերի ներմուծում է նախատեսում։ Արդյունքում, 2014թ.-ին Հայաստանում արդեն տվյալ տեսակի 3000-3500 տոննա ցորեն կլինի, որն էլ հետագայում կբաշխվի ֆերմերների միջև։ -0-
