Բնապահպանության և կլիմայի փոփոխության հարցերին նվիրված գաղափարների առաջին տոնավաճառը կանցկացվի հոկտեմբերի 7-ին ՀՀ Գիտությունների ազգային ակադեմիայում (ԳԱԱ), չորեքշաբթի «Նովոստի-Արմենիա» գործակալությանը տեղեկացրեցին ԳԱԱ տեղեկատվական-վերլուծական կենտրոնից:
Միջոցառման պաշտոնական անվանումն է «7-րդ շրջանակային ծրագրի տեղեկատվական և գործընկերների փնտրման աջակցության միջազգային միջոցառում»: Այն կազմակերպվում է ԵՄ 7 ՇԾ-ի Գիտատեխնիկական միջազգային համագործակցության ցանց` Արևելյան Եվրոպայի և Միջինասիական երկրների համար նախագծի շրջանակներում, միջոցառմանն աջակցում է Եվրահանձնաժողովը:
Սա առաջին միջոցառումն է Հայաստանում, որի հիմնական նպատակն է հնարավորություն ընձեռել բնապահպանության ոլորտի գիտնականներին և այլ շահառուներին՝ 7-րդ ՇԾ-ի Բնապահպանություն թեմատիկ ուղղության շրջանակներում քննարկելու ԵՄ, ԱՊՀ և տարածաշրջանային երկրների գիտնականների հետ համագործակցության հաստատման հնարավորությունները:
Կքննարկվեն նաև համատեղ նախագծեր նախապատրաստելու և 2011թ. բաց մրցույթին ներկայացնելու հնարավորությունները:
Միջոցառմանը բացման խոսքով հանդես կգա ՀՀ ԳԱԱ նախագահ, ակադեմիկոս Ռադիկ Մարտիրոսյանը: Հրավիրված են նաև ՀՀ-ում Եվրամիության պատվիրակության ղեկավար Ռաուլ դե Լուցենբերգերը, ՀՀ բնապահպանության նախարար Արամ Հարությունյանը, ՀՀ կրթության և գիտության նախարար Արմեն Աշոտյանը և Գիտության պետական կոմիտեի նախագահ Սամվել Հարությունյանը:
Միջոցառմանը կմասնակցեն շուրջ 90 գիտնականներ Հայաստանից, Բելգիայից, Գերմանիայից, Իռլանդիայից, Իտալիայից, Իսրայելից, Լեհաստանից, Ռումինիայից, Թուրքիայից, Ռուսաստանից, Ուկրաինայից, Բելառուսից, Վրաստանից, Մոլդովայից և միջինասիական երկրներից:
ԵՄ հետազոտությունների և զարգացման շրջանակային ծրագրերը համաեվրոպական համագործակցային գիտահետազոտական նախագծերի ֆինանսավորման հիմնական գործիքն են, որում կարող են մասնակցել նաև աշխարհի այլ երկրների կազմակերպությունները՝ այդ թվում նաև Հայաստանից: Այժմ գործում է հերթական 7-րդ շրջանակային ծրագիրը (7ՇԾ), որը մշակվել է 2007-2013թթ. համար և ունի ավելի քան 50 միլիարդ եվրո ընդհանուր բյուջե:-0-
