Հայաստանի 2010 թ.-ի լավագույն ուսուցիչ է ճանաչվել Սյունիքի մարզի Կապան քաղաքի թիվ 9 դպրոցի պատմության ուսուցչուհի Գայանե Ալավերդյանը, իսկ լավագույն դաստիարակ է ճանաչվել Կապանի թիվ 7 մանկապարտեզի դաստիարակչուհի Արշալույս Վեզիրյանը:
Դպրոցի լավագույն տնօրեն է ճանաչվել Սյունիքի մարզի Վերիշենի միջնակարգ դպրոցի տնօրեն Մատվեյ Ղազարյանը: Լավագույն ուսուցիչ, լավագույն դաստիարակի և դպրոցի լավագույն տնօրենի անվանակարգերում հաղթածները, ըստ ավանդույթի, նվեր կստանան ավտոմեքենա:
Նախօրեին՝ Ուսուցչի օրը, Ալ. Սպենդիարյանի անվան օպերայի և բալետի ակադեմիական թատրոնում տեղի է ունեցել հանդիսավոր արարողություն, որը նվիրված էր Ուսուցչի միջազգային տոնին: Միջոցառմանը մասնակցել են ՀՀ վարչապետ Տիգրան Սարգսյանը, ՀՀ ԿԳ նախարար Արմեն Աշոտյանը, պաշտոնական այլ անձինք և հասարակական-մշակութային գործիչներ:
Շնորհավորելով ուսուցիչներին` ՀՀ վարչապետը նշել է, որ տասնյակ երկրներում այսօր կարևորվում է ուսուցչի առաքելությունը, և «հայ ժողովուրդն իր պատմության մեջ նույնպես կարողացել է ըստ արժանվույն գնահատել այն և ուսուցչի նկատմամբ հարգանքը հաղորդել մեզ»:
«Իսկ մենք, համոզված եմ, այս մոտեցումը հաղորդելու ենք մեր ապագա սերունդներին, որովհետև մանկավարժը ամենակարևոր մասնագիտությունն է: Մեծ Բրիտանիայի վարչապետ Չերչիլն ասել է մի թևավոր խոսք. «Ցանկացած վարչապետ կերազեր ունենալ այնպիսի իշխանություն, ինչպիսին ունի ուսուցիչը»: Դա այդպես է. այսօր ուսուցիչն է կերտում մեր ապագան: Եթե մենք ուզում ենք պատկերացնել, թե ինչպիսին է լինելու Հայաստանը տասնամյակներ անց, ապա այն պետք է տեսնենք մեր ուսուցչի մեջ», - ասել է նա, չորեքշաբթի հաղորդում է ՀՀ կառավարության մամուլի ծառայությունը:
ՀՀ վարչապետը նշել է, որ ուսուցիչները պետք է մշտապես լինեն կառավարության ուշադրության կենտրոնում, որովհետև դա ազգային անվտանգության և ազգի ապագայի խնդիրն է:
«Ես ուրախ եմ ու հպարտ, որ այսօր ունեմ այդ հնարավորությունը Հայաստանի Հանրապետության կառավարության անունից մեծարելու մեր ուսուցիչներին և շնորհավորելու իրենց տոնի կապակցությամբ: Միևնույն ժամանակ մեծ պատիվ է ինձ համար, որ այսօր հնարավորություն եմ ունենալու պարգևատրել լավագույններին, որոնց ի դեպ ընտրել են հենց այդ ոլորտի պրոֆեսիոնալները», - ասել է Սարգսյանը:
Տիգրան Սարգսյանը վարչապետի հուշամեդալներով ու շնորհակալագրերով խրախուսել է նաև հանրապետության տարբեր դպրոցների մի շարք ուսուցիչների:
Լավագույն ուսուցչի, դաստիարակի և դպրոցի տնօրենի մրցույթն անցկացվում է Հայաստանում 2000 թ.-ից:-0-
