Կյանքից հեռացել է ՀՀ սահմանադրական դատարանի անդամ Ռաֆայել Պապայանը

Նախօրեին ծանր հիվանդությունից  կյանքից հեռացել է ՀՀ սահմանադրական դատարանի անդամ Ռաֆայել Պապայանը։ Ինչպես երեքշաբթի «Նովոստի-Արմենիա» գործակալությանը հաղորդեցին ՀՀ կառավարության մամուլի ծառայությունից, վարչապետ Տիգրան Սարգսյանի որոշմամբ ստեղծվել է կառավարական հանձնաժողով` ՀՀ սահմանադրական դատարանի նախագահ Գագիկ Հարությունյանի գլխավորությամբ։

Հաղորդագրության համաձայն՝ Ռաֆայել Պապայանի հոգեհանգիստը տեղի կունենա հոկտեմբերի 6-ին` ժամը 18։00-ին, Երևանի Սուրբ Հովհաննես եկեղեցում: Հուղարկավորությունը տեղի կունենա հոկտեմբերի 7-ին:

Ռաֆայել Պապայանը ծնվել է 1942թ.-ի դեկտեմբերի 22-ին Երևանում։ Հայկական քաղաքական և պետական գործիչ է, ով 1989թ.-ին կազմակերպել և ղեկավարել է Մարդու իրավունքների հայկական լիգիայի աշխատանքները։

1990թ.-ին Գերագույն խորհրդի պատգամավոր է ընտրվել։ 1995թ.-ին կրկին խորհրդարանի պատգամավոր է ընտրվել։ 1997թ.-ի սեպտեմբերից ՀՀ սահմանադրական դատարանի անդամ է։

Պարգևատրվել է Ռուս ուղղափառ եկեղեցու Սուրբ իշխան Դանիլ Մոսկովսկու մեդալով՝ «Ի փառս Սուրբ եկեղեցու աշխատանքի համար», Հայ Առաքելական եկեղեցու «Սուրբ Ներսես Շնորհալի» շքանշանով։ -0-