ԵՐԵՎԱՆ, 5 հոկտեմբերի. /Նովոստի-Արմենիա/. Հոլանդացի երիտասարդ գեղանկարիչ Ռալֆ Հայնենի աշխատանքների ցուցահանդեսը, որը նվիրված է հիմնականում հայկական եկեղեցիների թեմային, կանցկացվի հոկտեմբերի 6-16-ը և 18-28-ը Երևանում, հայտնեց «Միացյալ հայերը Հոլանդիայում» կազմակերպության ղեկավար Սվետա Աբրահամյանը։
«Առաջին ցուցահանդեսը տեղի կունենա հոկտեմբերի 6-16-ը Ալեքսանդր Թամանյանի անվան ճարտարապետության թանգարան-ինստիտուտում, կներկայացվի 36 աշխատանք։ Այնուհետև տեղի կունենա երկրորդ ցուցահանդեսը Նարեկացի մշակութային կենտրոնում»,- երեքշաբթի «Նովոստի» միջազգային մամուլի կենտրոնում ասաց Աբրահամյանը։
Նկարիչն իր հերթին նշեց, որ ցուցահանդեսներում ընդգրկված նկարների մեծամասնությունը նվիրված է հայ միջնադարյան մայրաքաղաք Անիի (գտնվում է ժամանակակից Թուրքիայի տարածքում) եկեղեցիներին և բնապատկերներին։ Ցուցադրության մնացած մասը բաղկացած է դիմանկարներից և մրգերով նատյուրմորտներից, որը հոլանդական գեղանկարչության հայտնի ժանր է։
Հայնենի խոսքերով, նա հասցրել է ծանոթանալ աշխարհի, մասնավորապես, Հնդկաստանի և Եվրոպայի բազմաթիվ եկեղեցիների և վանքերի ճարտարապետության հիանալի նմուշներին, սակայն նրա համար հայկական ճարտարապետությունը, մասնավորապես, հայկական եկեղեցիները, հատուկ տեղ են գրավում։
«Հայկական ճարտարապետական ոճը հետաքրքիր և խորհրդավոր է ինձ համար»,- ասաց գեղանկարիչը։ Հայնենը հավելեց, որ եթե նա պատկերեր Հայաստանը, ապա կընտրեր տաք, ինչպես Հայաստանն է, վառ կանաչ և հողագույն երանգները։
Հայնենը սկսել է իր ստեղծագործական ուղին 2000-ականներից։ Չստանալով մասնագիտական կրթություն՝ Հայնենն աշակերտել է ժամանակակից հայտնի հոլանդացի նկարիչների մոտ, որոնց թվում հատուկ առանձնացնում է Կորնելիուս Լեմյերին։
Հայկական ճարտարապետությանն ու մշակույթին Հայնենը ծանոթացել է նույն 2000-ականներին Եգիպտոս կատարած ուղևորության ժամանակ, որտեղ նա հայկական եկեղեցի է տեսել։ Առաջին անգամ գեղանկարիչը Հայաստան է այցելել 2006 թվականին, և իր ուղևորության ընթացքում ստեղծել է նկարներ հայկական հին եկեղեցիների և վանքերի՝ Սանահինի, Հաղպատի, Տաթևի, Գոշավանքի պատկերներով։ -0-
