Երևանի քաղաքապետարանը պետք է դադարեցնի թափառող շների սպանդը. կուսակցության ներկայացուցիչ

«Մենք առաջարկում ենք թափառող շների պաշտպանության համալիր ծրագիր ստեղծել... Քաղաքապետարանը պետք է թափառող շների սպանդը դադարեցնելու որոշում ընդունի։ Դա ոչ միայն կենդանիների, այլ նաև մեր խնդիրն է։ Մեր հասարակությունը մարդկային պետք է լինի»,- երկուշաբթի «Նովոստի» միջազգային մամուլի կենտրոնում հիրավիրված մամուլի ասուլիսի ընթացքում հայտարարեց Հակոբյանը։

Այս կապակցությամբ «Pro Paws» բարեգործական միության ներկայացուցիչ Նարե Արամյանը նշեց, որ «միայն այս տարի պետբյուջեից թափառող շների ոչնչացմանը 180 մլն դրամ է հատկացվել, ինչը համարժեք է 500 հազար դոլարին»։

Արամյանի խոսքերով, սա արդեն առաջին տարին չէ, երբ նմանատիպ գումար է հատկացվում Հայաստանին թափառող շների ոչնչացման նպատակով։

Հայտնի ռեժիսոր, արվեստի վաստակավոր գործիչ Արմեն Մազմանյանն իր հերթին նշեց, որ խնդրի լուծման համար Հայաստանը կարող է օգտվել մի շարք եվրոպական երկրների փորձից։

Ռեժիսորի խոսքերով, մի շարք եվրոպական երկրներում իր տուն թափառող կենդանի վերցրած ցանկացած քաղաքացի գրանցվում է և ամեն ամիս պետությունից կենդանու կերի և խնամքի միջոցների համար գումար է ստանում։

Մազմանյանը որպես խնդրի մեկ այլ լուծում համարում հասարակական կազմակերպությունների համար կենդանիների պաշտպանության նպատակով տարածքի հատկացումը, որտեղ հնարավոր կլինի խնամել թափառող կենդանիներին։ 

Կոմպոզիտոր Էդգար Գյանջումյանն ընդգծեց, որ այսօրվա հայ հասարակությունում անտարբերություն է նկատվում թափառող շների նկատմամբ։

Ըստ նրա, անշուշտ, թափառող կենդանիների, հատկապես շների շարքում, հանդիպում են կատաղության և այլ հիվանդությունների դեպքեր, «սակայն երբեմն մարդն ավելի վտանգավոր է հասարակության համար, քան անտուն կենդանին»։ -0-