Վրաստանը չի պատրաստվում Ադրբեջանի հետ համադաշնություն ստեղծել. Վրաստանի ԱԳՆ
Վրաստանը չի պատրաստվում Ադրբեջանի հետ համադաշնության մեջ մտնել, երկուշաբթի Երևանում մամուլի ասուլիսի ժամանակ հայտնեց Վրաստանի արտգործնախարար Գրիգոլ Վաշաձեն՝ մեկնաբանելով Վրաստանի նախագահի վերջին հայտարարությունները։
Վրաստանի նախագահ Միխայիլ Սահակաշվիլին մայիսի 20-21-ն Ադրբեջան կատարած այցի ժամանակ հայտարարեց, որ Վրաստանի և Ադրբեջանի հարաբերությունները կարելի է որպես համադաշնային որակել։
«Մենք չենք պատրաստվում համադաշնություն ստեղծել... Դա ընդամենը երկկողմ հարաբերությունների զարգացման փոխաբերական որակում է»,- իր հայ գործընկերոջ հետ ԶԼՄ-ների հետ համատեղ հանդիպման ժամանակ հայտնեց Վաշաձեն։
Վրաստանի արտգործնախարար Գրիգոլ Վաշաձեն այցով Հայաստանում է հոկտեմբերի 3-4-ը:
«Ինչպես հասկանում եք, նախագահ Սահակաշվիլին երբեք զգացմունքային հայտարարություններ չի անում, նա բավականին հստակ է բնութագրել վրաց-ադրբեջանական հարաբերությունները, որոնք ավելի մեծ են, քան ռազմավարական համագործակցությունը»,- հայտնեց Վաշաձեն։ -0-
