ԵՐԵՎԱՆ, 4 հոկտեմբերի. /Նովոստի-Արմենիա/. Հայաստանի նախագահ Սերժ Սարգսյանը գեներալ-մայոր Վլադիմիր Գասպարյանին նշանակել է պաշտպանության նախարարի տեղակալ` ազատելով նրան Ռազմական ոստիկանության պետի պաշտոնից, շաբաթ օրը հաղորդում է պետության ղեկավարի մամուլի ծառայությունը։
Մեկ այլ հրամանագրով Դավիթ Տոնոյանը Հայաստանի պաշտպանության նախարարի առաջին տեղակալ է նշանակվել։
Գեներալ-մայոր Վլադիմիր Գասպարյանը ծնվել է 1958թ.ին: 1989թ. ավարտել է ԽՍՀՄ ՆԳՆ քննչական բարձրագույն դպրոցը, ՀՀ զինված ուժերում է 1997 թվականից: Գեներալ-մայորի զինվորական կոչումը նրան շնորհվել է 16.08.2001թ.: Աշխատել է ՀՀ իրավապահ մարմիններում: 1989թ.-ից գեներալ-մայոր Գասպարյանը մասնակցել է ազգային ազատագրական պայքարին, ՀՀ հյուսիսային սահմանների պաշտպանության մարտերում` կոորդինացրել ներքին զորքերի կողմից իրականացվող մի շարք մարտական գործողություններ:
Հայրենիքին մատուցած ծառայությունների համար պարգևատրվել է «Վարդան Մամիկոնյան» շքանշանով, «Արիության համար», «Հայրենիքին մատուցած ծառայությունների համար» 2-րդ աստիճանի, «Անբասիր ծառայության համար» 1-ին և 2-րդ աստիճանի մեդալներով, «Մարշալ Բաղրամյան», «Գարեգին Նժդեհ», «Դրաստամատ Կանայան», «Վազգեն Սարգսյան» գերատեսչական մեդալներով:
Դավիթ Տոնոյանը ծնվել է 1967թ.-ին: Ավարտել է Երևանի պետական համալսարանը և Մոսկվայի ռազմադիվանագիտական ակադեմիան: Ծառայել է ՆԳՆ համակարգում, ՀՀ զինված ուժերում է 1994 թվականից: Եղել է ՆԱՏՕ –ում ՀՀ ԶՈՒ ներկայացուցիչ: 2007 թվականից մինչ նշանակումը եղել է ՀՀ պաշտպանության նախարարության պաշտպանական քաղաքականության վարչության պետ:
Անբասիր և բարեխիղճ ծառայության համար պարգևատրվել է «Հայրենիքին մատուցած ծառայությունների համար» 2-րդ աստիճանի, «Անդրանիկ Օզանյան», «Վազգեն Սարգսյան», « Անբասիր ծառայության համար» 1-ին, 2-րդ և 3-րդ աստիճանի մեդալներով: -0-
