Երկուսուկես ամսից Կոմիտասի անվան այգում տեղակայված երևանյան դելֆինարիումում արդեն կլողա Օդեսայից բերված չորս դելֆին, երկու փոկ, մեկ ջրառյուծ, հինգշաբթի տեղեկացնում է Երևանի քաղաքապետարանի մամուլի ծառայությունը:
«Երևանի քաղաքապետարանը սկսել է Կոմիտասի անվան զբոսայգու վերականգնման աշխատանքները: Զբոսայգին տարիներ առաջ անհատույց օգտագործման իրավունքով հատկացվել էր մասնավոր մի ընկերության, պայմանով, որ վերջինս ապահովի զբոսայգու խնամաքն ու բարեկարգումը։ Բայց տնտեսվարողը զբոսայգին պահպանելու ու բարեկարգելու ուղղությամբ բացարձակապես ոչինչ չէր արել: 90-ականներից չգործող կարուսելներն ու ատրակցիոնները մետաղակույտի են վերածվել։ Երևանի երբեմնի լավագույն զբոսայգուց որպես հուշ մնացել են միայն ծառերը։ Զբոսայգու տարածքից վերջին տարիներին առանձնացվեց Պանթեոնը, որը բարեկարգ վիճակում է»,- նշվում է հաղորդագրությունում։
Երևանի քաղաքապետը հիշեցնում է, որ 2009 թվականին Երևանի քաղաքապետ ընտրվելուց հետո Գագիկ Բեգլարյանը հանձնանարեց կազմել Երևանի զբոսայգիների վերականգնման ծրագիր, որտեղ առաջնահերթություններից մեկը տրվեց հենց Կոմիտասի անվան զբոսայգուն։ Ինչպես նշեց քաղաքապետի տեղակալ Կամո Արեյանը, ելնելով զբոսայգու անմխիթար վիճակից, որպես առաջին քայլ անբարեխիղճ տնտեսվարողի հետ խզվեց պայմանագիրն ու զբոսայգին հետ վերադարձվեց երևանցիներին:
Վերականգնման ծրագրի շրջանակներում այստեղ կառուցվում է հանրապետությունում առաջին դելֆինարիան: Կառուցումն իրականացնում է ուկրաինական «Ներում» ընկերությունը, որը, ինչպես նշում է ընկերության տնօրեն Ալեքսանդր Մեռլյանը, դելֆինարիաներ է կառուցել Կիևում, Օդեսայում, Դոնեցկում, Խարկովում: Դելֆինարիայի կառուցումը Երևանի քաղաքապետի ուշադրության կենտրոնում է։
900 հանդիսատեսի համար նախատեսված դելֆինարիան կգործի այգու՝ արդեն վաղուց չգործող ատրակցիոնի տեղում։ Մետաղական կոնստրուկցիայով կառույցի ստորին հատվածում տեղադրվելու են տեխնիկական սարքավորումները։ Իսկ աստիճանները կտանեն դեպի տրիբունա, որտեղ 5 մետր խորությամբ 18 մետր շառավղով ջրավազանն է։ Ջրի ջերմաստիճանը մշտապես լինելու է 20-22 աստիճան, ջրավազանում 1500 խմ ծավալով ջուր է լցվելու, ինչը լիովին բավարար ջրային միջավայր է, որպեսզի կենդանիներն իրենց հարմարավետ զգան։
«Ներում» ընկերությունը կիրականացնի նաև դելֆինարիի շահագործումն ու սպասարկումը։ Բարեկարգման ծրագրի շրջանակներում Երևանի քաղաքապետարանի կողմից զբոսայգում անցկացվելու են ոռոգման և արտաքին լուսավորության նոր ցանցեր, տեղադրվելու են կարուսելներ, վերականգնվելու են ծառուղիները, կառուցվելու է ավտոհանգրվան։
«Երևանի քաղաքապետարանը նույն քաղաքականությունն է կիրառելու նաև Երևանի մյուս զբոսայգիներում։ Ելնելով երևանցիների շահերից, անբարեխիղճ տնտեսվարողների հետ անհատույց օգտագործման պայմանգիրը խզելու Կոմիտասի զբոսայգու նախադեպը առաջինն է, բայց ոչ վերջինը»,- ասվում է հաղորդագրությունում։ -0-
