Բարեկամության հայ-շվեցարական խորհրդարանական խումբը նպաստում է երկու երկրների հարաբերությունների խորացմանը. ՀՀ ԱԺ ղեկավար
Հայաստանի և Շվեցարիայի միջև բարեկամական հարաբերությունները զարգանում և խորանում են բարեկամության հայ-շվեցարական խորհրդարանական խմբի եռանդուն և անկողմնակալ աշխատանքի շնորհիվ, նախօրեին Բեռնում խմբի անդամների հետ հանդիպման ժամանակ ասաց ՀՀ ազային ժողովի նախագահ Հովիկ Աբրահամյանը։
Ինչպես չորեքշաբթի «Նովոստի-Արմենիա» գործակալությանը հաղորդեցին ԱԺ մամուլի ծառայությունից, ԱԺ նախագահը նշել է, որ երկու ժողովուրդները նույն հոգևոր և մշակութային արժեքների կրողներն են, երկու երկրները գրեթե նույն բնապատկերն ունեն, չունեն ելք դեպի ծով, սակայն ունեն համոզմունքներ, հմտություններ և գիտելիքներ:
Հովիկ Աբրահամյանն իր երախտագիտությունը հայտնեց 2003 թ. դեկտեմբերի 16-ին Հայոց ցեղասպանության ճանաչման վերաբերյալ Շվեյցարիայի Ազգային Խորհրդի կողմից բանաձևի ընդունման համար և այդ գործում ընդգծեց Շվեյցարիա-Հայաստան բարեկամական խմբի ծավալած ակտիվ գործունեությունը:
Նա նշեց, որ հայ-շվեյցարական երկկողմ հարաբերությունների առավել սերտացման համար կարևոր է միջխորհրդարանական համագործակցության զարգացումը: Այդ համատեքստում նա գոհունակություն հայտնեց Շվեյցարիայի խորհրդարանում հայ-շվեյցարական բարեկամության խմբի ծավալած ակտիվ և արդյունավետ գործունեության համար` նշելով, որ 2008 թ. բարեկամական խմբի այցը Հայաստան բավականին արդյունավետ էր եւ խթան հանդիսացավ ոչ միայն խորհրդարանական համագործակցության խորացման, այլեւ տնտեսական կապերի ամրապնդման եւ զարգացման համար:
Շվեյցարիա-Հայաստան բարեկամության խորհրդարանական խմբի համանախագահներ Ուելի Լոյենբերգերը և Դոմինիկ Դը Բյումանը բարձր գնահատեցին ՀՀ ԱԺ նախագահ Հովիկ Աբրահամյանի այցը երկու երկրների բարեկամությունը եւ փոխգործակցությունը ամրապնդելու եւ խորացնելու առումով:
Շվեյցարացի պատգամավորները կարևորեցին միջխորհրդարանական հարաբերությունների խորացումը, փոխայցերը և համագործակցությունը միջազգային կառույցներում:
Աբրահամյանի գլխավորած պաշտոնական պատվիրակությունը կազմում են ԱԺ առողջապահության, մայրության և մանկության հարցերի մշտական հանձնաժողովի նախագահ, Հայաստան-Շվեյցարիա բարեկամական խմբի նախագահ Արա Բաբլոյանը, ԱԺ տնտեսական հարցերի մշտական հանձնաժողովի փոխնախագահ Վարդան Բոստանջյանը։
Շվեցարիայի մայրաքաղաքում պատվիրակությանը միացել է Շվեցարիայում Հայաստանի արտակարգ և լիազոր դեսպան Շառլ Ազնավուրը։
Սեպտեմբերի 29-ին ԱԺ նախագահ Հովիկ Աբրահամյանի գլխավորած պատվիրակությունը հանդիպումներ կունենա Շվեյցարիայի Համադաշնության նորընտիր փոխնախագահ, Արտաքին գործերի նախարար Միշլին Կալմի-Ռեյի, Համադաշնության Պետությունների խորհրդի նախագահ Էրիկա- Ֆորստեր Վանինիի և Ազգային խորհրդի նախագահ Պասկալ Բրուդերեր Ուիսի հետ: -0-
