ԵՐԵՎԱՆ, 28 սեպտեմբերի. /Նովոստի-Արմենիա/. Պետկառավարման մարմինները պետք է թափանցիկ լինեն իրենց գործունեությունում, կարծում է Հայաստանի վարչապետ Տիգրան Սարգսյանը։
«Այս համատեքստում մենք մեծ ջանքեր ենք գործադրում, որպեսզի պետմարմինների ընդունած բոլոր որոշումները հասանելի լինեն հասարակայնության համար, իսկ որոշումների նախագծերը հասարակության հետ նախնական քննարկումների առարկա դառնան»,- երեքշաբթի ասաց Սարգսյանը տեղեկատվության ազատության ոլորտում մրցանակաբաշխության ընթացքում։
Միաժամանակ վարչապետը նշեց, որ դա հնարավորություն կտա պետական մարմիններին հաշվի առնել հանրային կարծիքը։ «Այս առումով մենք բավականին մեծ նվաճումներ, բայց և լուրջ բացեր ունենք»,- հավելեց նա։
Սակայն, վարչապետի կարծիքով, պակաս կարևոր չէ այն, թե պատրա՞ստ է, արդյոք, հասարակությունը աշխատելու այդ տեղեկատվության հետ։
Ընդգծելով, որ պետական կառույցների թափանցիկությունը և առաջարկվող տեղեկատվության հետ հասարակության աշխատանքի հնարավորությունը երկկողմ հարաբերությունների հարթությունում են, Սարգսյանը նշեց, որ այդ հարցում անհրաժեշտ է կարողանալ բալանս ապահովել։
«Այս տեսակետից մենք կարևորում ենք մեր աշխատանքը հասարակական և միջազգային կազմակերպությունների հետ», ասաց կառավարության ղեկավարը՝ նշելով, որ վերջինները օժանդակում են հասարակական կազմակերպություններին՝ դրանց կայացման և նման երկխոսության պատրաստ լինելու նպատակով:
Ավելի քան 100 երկրներում նշվող Տեղեկատվության ազատության միջազգային օրվա կապակցությամբ Տեղեկատվության ազատության կենտրոնը ութերորդ տարին անընդմեջ մրցանակներ է հանձնում այս ոլորտում։
2010 թվականին բաց և լավ աշխատանքի խորհրդանիշ «Ոսկե բանալի» են ստացել մրցույթի վեց հաղթողները՝ Գորիսի ադմինիստրացիան, Հայաստանի կառավարության էլեկտրոնային կայքը, «Մենք ենք այս քաղաքի տերերը» քաղաքացիական նախաձեռնությունը, հայկական երկրորդ հեռուստաալիքի «Խոսքի իրավունք» հաղորդաշարը, ինչպես նաև «Առավոտ» օրաթերթի լրագրող Արամ Զաքարյանը և Հակոբ Թովմասյանը՝ որպես քաղաքացի, ով լավագույնս է օգտագործել տեղեկատվության ստացման իրավունքը։
«Ժանգոտ բանալի» ավանդական բացասական մրցանակին փակ և վատ աշխատանքի համար արժանացել է Ստեփանավանի ադմինիստրացիան՝ որպես կառույց, որն ամենավատ կերպով է կատարել «Տեղեկատվության ազատության մասին» օրենքով ամրագրված իր պարտականությունները 2010 թվականին։ -0-
