Սահմանային անվտանգության ապահովման և պետական սահմանի համալիր կառավարման ռազմավարությունը, որը շաբաթ օրը հավանության է արժանացել Ազգային անվտանգության խորհրդի կողմից, կնպաստի բյուրոկրատական քաշքշուքի վերացմանը, երկուշաբթի հայտարարեց Հայաստանի Ազգային անվտանգության խորհրդի քարտուղար Արթուր Բաղդասարյանը։
«Վստահ եմ, որ ռազմավարության ընդունումը թույլ կտա որակապես նոր մակարդակի բարձրացնել ծրագրված բարեփոխումները։ Ռազմավարության գլխավոր կարգախոսն է՝ «Սահուն անցում անվտանգ սահմանով»։ Դա թույլ կտա ապահովել հուսալիորեն պաշտպանված սահման՝ առանց բյուրոկրատական քաշքշուքի բեռնափոխադրումների և մարդկանց տեղափոխման հարցում և աստիճանական անցում «մեկ պատուհանի» համակարգին»,- ասաց Բաղդասարյանը։
Նա նշեց, որ ռազմավարությունը մշակված է ՄԱԿ-ի, ԵՄ և Ռուսաստանի փորձագետների ընդգրկմամբ։ Բաղդասարյանի խոսքերով՝ այսօր սահմանային անվտանգության ապահովմամբ են զբաղվում սահմանապահները, Ոստիկանությունը, մաքսային ծառայությունը, Առողջապահության և Գյուղատնտեսության նախարարությունները։
«Հարկ է վերլուծել սահմանին յուրաքանչյուր գերատեսչության գործողությունները և մեկ պատուհանի համակարգ ներդնել՝ բեռների և մարդկանց փոխադրմանն աջակցելու համար»,- ասաց նա։
Ազգային անվտնագության քարտուղարն ընդգծեց, որ սահմանամերձ անվտանգության տեսանկյունից այս փաստաթուղթը կարևոր նշանակություն ունի, նրանում վերլուծության են ենթարկվել Իրանի, Վրաստանի, Ադրբեջանի, Թուրքիայի հետ սահմաններին վերաբերող հարցեր։
«Մանրամասն վերլուծվել են մարտահրավերները, ռիսկերը, դրանց հաղթահարման ուղիները, մշակվել է հստակ ռազմավարություն և առկա խնդիրների լուծում՝ միջազգային չափանիշներին համապատասխան»,- ասաց նա։
Բաղդասարյանը նշեց, որ նախագահը հանձանարարել է, իսկ Խորհուրդը որոշում է ընդունել եռամսյա ժամկետում մշակել միջոցառումների ծրագիր և կատարման ժամանակացույց՝ ելնելով ընդունած ռազմավարությունից, և հետևողական լինել լայնածավալ աշխատանք ենթադրող միջոցառումների իրագործման հարցում։
Ազգային անվտանգության քարտուղարը տեղեկացրեց նաև, որ այս տարի ԵՄ հետ համագործակցության ծրագրի շրջանակներում կսկսվի «Բագրատաշեն» մաքսակետի (հայ-վրացական սահման) տեխնիկական վերազինումը, ինչպես նաև սահմանային ենթակառուցվածքների արդիականացում, կլինի պետական սահմանի կառավարման համալիր ծրագիր։
«Դա թույլ կտա էապես ուժեղացնել սահմանում խոխտումների դեմ պայքարը, արդիականացնել և որակական նոր մակարդակի բարձրացնել ՀԱԿ-ի տեխնիկական զինումը, ինչպես նաև դրական արդյունքների հասնել միջազգային գործընկեր կազմակերպությունների հետ սերտ համագործակցությամբ»,- ասաց Բաղդասարյանը։ -0-
