Հայստանի կրթության համակարգը որակի վերահսողության գնահատման գործիքի կարիք ունի, հինգշաբթի Երևանում մեկնարկած ռուս փորձագետների հետ երկօրյա խորհրդակցական հանդիպման ժամանակ ասաց ՀՀ կրթության և գիտության նախարար Արմեն Աշոտյանը։
Խորհրդակցական հանդիպումը նպատակ ունի, մասնավորապես՝ ամրապնդել Հայաստանի և Ռուսաստանի կրթության ոլորտի մասնագետների միջև պրոֆեսիոնալ կապը։
ՌԴ կառավարությանն առընթեր Ժողովրդական տնտեսության ակադեմիայի Կրթության զարգացման միջազգային համագործակցության կենտրոնը մտադիր է 2010-2012թթ.-ին Հայաստանում մի նախագիծ իրականացնել, որը թույլ կտա գնահատել 14-15 տարեկան դպրոցականների տեղեկատվական և հաղորդակցական իրազեկության մակարդակը և վիճակագրության հիման վրա միջնակարգ կրթության որակի վերահսկման գործիք ստեղծել։
Ըստ կրթության նախարարի՝ կրթության որակի գնահատման արդյունավետության բարձրացման համապատասխան մեխանիզմենրի ստեղծման ռուսական փորձը կարող է օգտագործվել Հայաստանում։
«Հայաստանի և Ռուսաստանի կրթական համակարգերն ընդհանուր բնույթ ունեն, քանի որ երկուսն էլ հետխորհրդային համակարգեր են, և դա հիմք է տալիս ենթադրելու, որ Հայաստանում ռուսական փորձի ներմուծումը լիովին հնարավոր է»,- ասաց նախարարը։
Կրթության ռուսական ակադեմիայի փոխնախագահ Վիկտոր Բոլոտովն իր հերթին նշեց, որ առանց իրական տեղեկատվության տիրապետման անհնար է խոսել կրթության որակի գնահատման մասին։
«Եթե սովորողը չի կարող քննադատորեն վերաբերվել տեղեկատվությանը, ապա նա տարբեր մանիպուլյացիաների օբյեկտ է դառնում»,- ասաց ակադեմիկոսը։
Նա նաև նշեց, որ և Հայաստանում, և Ռուսաստանում կրթությունը գնահատվում է միայն ազգային քննության արդյունքներով։ Բոլոտովը վստահություն հայտնեց, որ կրթության որակի վերահսկման համար դա բավարար չէ։
Այդ կապակցությամբ նա նշեց վիճակագրական հետազոտություններ անցկացնելու անհրաժեշտությունը։ «Վիճակագրության հետ խնդիրներ առկա են և Հայաստանում, և Ռուսաստանում։ Մենք կներկայացնենք, թե ինչ մշակումներ կան Ռուսաստանում, ինչը կարող է Հայաստանի համար հետաքրքրություն ներկայացնել»,- նշեց ակադեմիկոսը։
Միաժամանակ Համաշխարհային բանկի մոսկովյան գրասենյակի վերլուծաբան Տիգրան Շմիսը ներկայացրեց READ (Russian education Aid Development) ծրագիրը, որի շրջանակներում Ռուսաստանում բարձր աստիճանի հանրակրթական հաստատություններում սովորողների տեղեկատվական-հաղորդակցական իրազեկության գնահատման մասնագիտական գործիք է մշակվում։
«Դպրոցի տեղեկատվայնության արդյունքներից մեկը պետք է լինի աշակերտների և ուսուցիչների մոտ տարբեր խնդիրներ լուծելու համար ժամանակակից տեղեկատվական տեխնոլոգիաներն օգտագործելու ունակության առաջացումը»,- ասաց Շմիսը։
Նա նաև նշեց, որ ազգային կրթական համակարգի կողմից ապահովվող կրթության որակն է հենց կանխորոշում տնտեսական աճի վրա դրա ազդեցության աստիճանը, հասարակության մեջ սոցիալական անհավասարության նվազումը և բնակչության կյանքի որակը։
«Կրթությունը հատկապես արժեքավոր է բնակչության անապահով շերտի համար, քանի որ նրանց համար դա իբրև «սոցիալական վերելակ է» ծառայում»,- ասաց ՀԲ ներկայացուցիչը։
Հայաստանի և Ռուսաստանի միջև կրթության ոլորտում համագործակցության ուղղությունների քննարկման խորհրդակցական հանդիպումն անցկացվում է սեպտեմբերի 23-24-ը Երևանում՝ Համաշխարհային բանկի աջակցությամբ։
Հանդիպման կազմակերպիչներն են ՀՀ կրթության և գիտության նախարարությունը, ՌԴ կառավարությանն առընթեր Ժողովրդական տնտեսության ակադեմիայի Կրթության զարգացման միջազգային համագործակցության կենտրոնը, ինչպես նաև ՀԲ-ն։-0-
