Հայաստանի սահմանային անվտանգության ապահովման հայեցակարգը կընդունվի մինչև սեպտեմբերի վերջը. ԱԽ քարտուղար
Հայաստանի սահմանային անվտանգության ապահովման հայեցակարգը կընդունվի Հայաստանի Ազգային անվտանգության խորհրդում մինչև սեպտեմբերի վերջը, ասաց ԱԽ քարտուղար Արթուր Բաղդասարյանը։
«Մենք շուրջ մեկ տարի աշխատել ենք այդ հայեցակարգի ստեղծման ուղղությամբ: Եվ այդ ժամանակահատվածում արդյունավետ երկխոսություն է հաստատվել միջազգային կազմակերպությունների հետ։ Սահմանային անվտանգությունը բարդ և բազմակողմանի խնդիր է, որը Հայաստանի համար շատ մեծ նշանակություն ունի»,- ասաց Բաղդասարյանը՝ ելույթ ունենալով Հայաստանի և Վրաստանի սահմանների կառավարման ռազմավարությունների մշակման և կատարելագործման միջգերատեսչական աշխատանքային խմբի սեմինարի ժամանակ։
Ըստ ԱԽ քարտուղարի՝ Հայեցակարգի մշակման գործում Հայաստանը բարձր է գնահատում ԵՄ խորհրդատվական խմբի աջակցությունը։
«Այդ հայեցակարգի ընդունումը չափազանց կարևոր նշանակություն ունի ազգային անվտանգության ապահովման տեսակետից»,- ասաց Բաղդասարյանը։
Նա տեղեկացրեց, որ Ազգային անվտանգության խորհրդում Հայեցակարգի ընդունմանը կհետևի նախագահի հրամանը, որից հետո կառավարությունը կսկսի աշխատանքների ֆինանսավորման հարցի քննարկումը։ -0-
