Ժնևի համալսարանից շվեյցարացի հայտնի աստղաֆիզիկոս Միշել Մայորը և նրա գիտական խմբի երկու անդամները՝ Կանարյան կղզիների Աստղաֆիզիկայի ինստիտուտի աշխատակից Գարիկ Իսրայելյանը և Պորտոյի համալսարանի Աստղաֆիզիկայի կենտրոնի աշխատակից Նունո Սանտոսն արժանացել են Վիկտոր Համբարձումյանի անվան առաջին գիտական մրցանակին։
Վիկտոր Համբարձումյանի անվան միջազգային մրցանակը սահմանվել է 2009 թվականին Հայաստանի նախագահի կողմից։ Աստղաֆիզիկայի և աստղագիտության ոլորտի այս հեղինակավոր մրցանակը շնորհվում է ցանկացած երկրի և ազգության գիտնականների, ովքեր էական ավանդ են ներդրել գիտության զարգացման մեջ։
«Մենք շատ ուրախ ենք, որ շուտով կստանանք մրցանակը նախագահի ձեռքից։ Մեր հետազոտությունների ոլորտը արտարեգակնային մոլորակներն են, և մրցանակի արժանացած աշխատանքն ուղղված է եղել դրանց ֆիզիկական բնութագրերի ուսումնասիրմանը՝ հասկանալու համար, թե ինչ աստղեր են գտնվում արեգակնային համակարգից դուրս»,-ասաց Մայորը։
Նա հայտնեց, որ իր խումբը հայտնաբերել է մեծ կշիռ ունեցող մոլորակներ՝ Սատուրնի և Յուպիտերի նման, բայց վերջին տարիներին իրենք մոտեցել են, այսպես կոչված, «ժայռային մոլորակների» հայտնաբերմանը։
Մրցանակը շնորհվում է աստղաֆիզիկայի, ինչպես նաև ֆիզիկայի և մաթեմատիկայի բնագավառում աչքի ընկնող աշխատանքների համար։ Մրցանակը, որն առաջին անգամ շնորհվում է 2010 թվականին, կհանձնվի երկու տարին մեկ անգամ։ Մրցանակի չափը կազմում է 500 հազար ԱՄՆ դոլար։
Դափնեկիրներն ընտրվել են Հայաստանի ԳԻտությունների ազգային ակադեմիայի նախագահ Ռադիկ Մարտիրոսյանի գլխավորած միջազգային հանձնաժողովի որոշմամբ, որը ներառյալ 2010 թվականի մարտի 18-ը 14 հայտ է ստացել ականավոր գիտնականներից և գիտական խմբերից ազգային տարբեր ակադեմիաներից, համալսարաններից, աստղադիտարաններից։ -0-
