Հարավկովկասյան գործընկերների հետ հարաբերությունները ՆԱՏՕ-ի համար առաջնահերթ կմնան. Սիմոնս

Հարավկովկասյան գործընկերների հետ ՆԱՏՕ-ի հարաբերությունները Դաշինքի համար առաջնահերթ կմնան, ՀՀ պաշտպանության նախարար Սեյրան Օհանյանի հետ հանդիպման ժամանակ ասաց Կովկասում և Կենտրոնական Ասիայում ՆԱՏՕ-ի գլխավոր քարտուղարի հատուկ ներկայացուցիչ Ռոբերտ Սիմոնսը, հինգշաբթի հաղորդում է ՊՆ մամուլի ծառայությունը:

Ըստ նրա՝  նման առաջնահերթությունների պահպանումը դիտարկվում է ՆԱՏՕ-ի նոր ռազմավարական հայեցակարգի համատեքստում:

Խոսելով գործընկեր երկրների կողմից այդ համագործակցությունն իրենց կարիքներին համապատասխանեցնելու մասին՝ Սիմոնսը նշեց, որ Հայաստանի դեպքում դա կատարվել է Անհատական գործընկերության գործողությունների ծրագրի և մի շարք այլ ենթածրագրերի միջոցով, ինչն իր բնույթով օրինակելի է:

Հանդիպման ընթացքում քննարկվեցին տարածաշրջանային անվտանգությանը, Հայաստան-ՆԱՏՕ անհատական գործընկերության գործողությունների ծրագրում պաշտպանության բնագավառի նոր նպատակների հավելմանը, բազմազգ գործողություններին ՀՀ զորակազմերի մասնակցությանն առնչվող հարցեր:

Կողմերը բարձր գնահատեցին Հայաստանում պաշտպանական բարեփոխումների և Անհատական գործընկերության գործողությունների ծրագրի իրականացման ուղղությամբ գրանցված առաջընթացը:

ՀՀ պաշտպանության նախարարը հատուկ ընդգծեց Կովկասում և Կենտրոնական Ասիայում ՆԱՏՕ-ի գլխավոր քարտուղարի հատուկ ներկայացուցչի պաշտոնի կարևորությունը և շնորհակալական խոսքեր ուղղեց Ռոբերտ Սիմմոնսին` անցած 7 տարիների ընթացքում նրա կողմից իրականացված արդյունավետ գործունեության համար:

Քննարկումները շարունակվել են նաև հանդիպմանը հաջորդած պաշտոնական ընթրիքի ընթացքում: -0-