Հակոբոս Երուսաղեմցու «Ապրիլ 24» ռեքվիեմը արգանքի տուրք է Օսմանյան կայսրությունում Հայոց ցեղասպանության զոհերի հիշատակին, հայ ժողովրդի ցավի և բողոքի մարմնավորումն է, հայտարարեց ստեղծագործության հեղինակը։
«Երբ մանուկ էի, մայրս հաճախ էր պատմում հայերի կոտորածի մասին, հետո լաց էր լինում... երբեք չեմ մոռանա նրա արցունքները, ինչպես նաև հորս արցունքները... հենց այդ ժամանակ՝ հեռավոր մանկության տարիներին ես ինքս ինձ խոստացա գրել որևէ գործ և դրանով թեթևացնել ծնողներիս ցավը»,- չորեքշաբթի ռեքվիեմի ձայնագրությամբ սկավառակի շնորհանդեսի ժամանակ ասաց կոմպոզիտորը։
CD-ն բաղկացած է ութ մասից՝ «Ապրիլ 24», «Անարդար հարձակման ծովից», «Այս ապրիլ հիշում ենք մենք», «Միլիոնավոր դերզորցիներ», «Միլիոնավոր հայեր են քայլում ողբալով», «Քայլում են... դաժան», «Թույլ չտվեցին... ազատություն», «Երգում-ողբում ենք, որ քիչ ենք մենք», «Ոչ, ոչ, ոչ, մենք չենք մերժում մահը»: Խոսքերի հեղինակն է Ժակ Հակոբյանը:
Հայաստանի ազգային ռադիոյի տնօրեն Արմեն Ամիրյանի խոսքերով՝ ռեքվիեմի ծնունդը ևս մեկ քայլ է 1915 թվականի Հայոց ցեղասպանության համաշխարհային ճանաչման ճանապարհին։
«Երաժշտությունը զուսպ է, բայց դրանում զգացվում է ներքին լարվածությունը»,- կարծում է Երևանի կամերային թատրոնի երաժշտական ղեկավար, կոմպոզիտոր Վահե Հայրապետյանը։
Իր հերթին Հայաստանի ազգային գրադարանի տնօրեն Դավիթ Սարգսյանը խոստացավ տարածել սկավառակն ավելի քան 70 երկրներում գործընկերների՝ այլ երկրների ազգային գրադարանների օգնությամբ։
Հակոբոս Երուսաղեմցին (Ջամբազյան) ծնվել է 1937 թվականի փետրվարի 5-ին Երուսաղեմում։
40 տարի Հակոբոսը հայկական հաղորդումներ է վարել Մոնտե Կառլոյի Ռադիոյում։ Այդ հաղորդումները յուրօրինակ պատուհան էին խորհրդային ունկնդիրների համար դեպի մեծ աշխարհ։
Նրա ստեղծագործությունում մեծ տեղ են զբաղեցնում աստվածաշնչյան մոտիվներով գրված հոգևոր երգերը, ինչպես նաև հայրենիքին («Գարուն Հայաստան» շարքը) և մայրությանը (Հովհաննես Շիրազի բանաստեղծությունների հիման վրա գրված երգերի շարք) նվիրված երգերը։
Հայաստանում 1988 թվականի ավերիչ երկրաշարժից հետո նա ընտանիքով Գերմանիայից տեղափոխվեց Երևան։
Որդու՝ Պարույր Ջամբազյանի հետ, կոպմոզիտորը հիմնեց «Դիակոնիա» բարեգործական հիմնադրամը և «Հույսի ավան» բնակելի թաղամաս կառուցեց բազմազավակ և անտուն ընտանիքների համար, որտեղ ներկայումս ապրում է 72 ընտանիք։
Ջամբազյանների ընտանիքը զբաղվում է նաև 6 հազար անչափահաս երեխաների ֆինանսական օժանդակությամբ և ֆինանսավորում է շնորհալի երաժիշտների ուսումը բուհերում։
Այսօր Հակոբոս Երուսաղեմցին վարում է «Ավետիս» ճանաչված հաղորդումը Հայաստանի հանրային ռադիոյում։ -0-
