Հայաստանի գազամատակարարումը դադարեցվել է մինչև սեպտեմբերի 17-ը. «ՀայՌուսգազարդ»

Վրաստանից տարանցիկ ճանապարհով Հայաստան մտնող գազը լիովին դադարեցվել է մինչև սեպտեմբերի 17-ը մայրուղային գազատարի նորոգման պատճառով, չորեքշաբթի «Նովոստի-Արմենիա» գործակալությանը տեղեկացրեցին «ՀայՌուսգազարդ» ընկերությունից:

«Սեպտեմբերի 15-ից 17-ը լիովին դադարեցվում է Վրաստան և Հայաստան մատակարարվող գազը «Հյուսիսային Կովկաս-Անդրկովկաս» մայրուղային գազատարի վրա «Գազպրոմ տրանսգազ Էքսպորտ» ԲԲԸ-ի կողմից իրականացվող պրոֆիլակտիկ աշխատանքների կապակցությամբ»,- ասվում է «ՀայՌուսգազարդ»-ի մամուլի հաղորդագրության մեջ` «Գազպրոմ տրանսգազ Էքսպորտ» ԲԲԸ-ին արված հղումով:

Միաժամանակ հայ-ռուսական ընկերությունում վստահեցնում են, որ գազամատակարարման դադարեցումը չի անդրադառնա սպառողների վրա:

Չդադարող գազամատակարարումը սովորաբար շարունակվում է Աբովյանի գազի ստորգետնյա պահեստարան-կայանի պաշարների շնորհիվ:

Աբովյանի գազի պահեստարան-կայանը Հայաստանի գազատրանսպորտային համակարգի գլխավոր տարրերից է, որն ապահովում է հանրապետության էներգետիկ անվտանգությունը:

Աբովյանի գազի ստորգետնյա պահեստարան-կայանը գազի արդյունաբերական օգտագործման մեջ կարգավորում է սեզոնային և պիկային անհամաչափությունները:

Գազի մատակարարման օբյեկտների խափանման դեպքում այս կայանը, կախված տարվա ժամանակից, կարող է գազ մատակարարել 1-1,5 ամսվա ընթացքում: «ՀայՌուսգազարդ» ՓԲԸ-ն Հայաստանի ներքին շուկայում ռուսական բնական գազի մատակարարման և տեղաբաշխման մենաշնորհային իրավունք ունի։ Գազը մուտք է գործում Հայաստան Վրաստանի տարածքով:

Ընկերությունը ստեղծվել է 1997 թ.-ին, «Գազպրոմ» ԲԲԸ-ի մասնաբաժինն ընկերության կանոնադրական կապիտալում կազմում է 80 տոկոս, Հայաստանի կառավարության բաժինը՝ 20 տոկոս: -0-