Հայաստանը պետք է դուրս գա Ադրբեջանի հետ բանակցային գործընթացից մինչ այն ժամանակ, երբ այդ երկրում բանակցություններին նպատակաուղղված պետական համակարգ կստեղծվի, երեքշաբթի լրագրողներին ասաց ««Սահմանադրական իրավունք» միություն» կուսակցության նախագահ Հայկ Բաբուխանյանը։
Ըստ նրա՝ տվյալ փուլում բանակցային գործընթացի շարունակումը ոչ միայն աննպատակահարմար է, այլ նաև անտրամաբանական է։
«Այսօր Ադրբեջանը հանդես գալիս է որպես ռասիստական պետություն, որը որդեգրել է դիվերսիաների քաղաքականությունը, որտեղ հայ սպանելու համար պարգև են ստանում»,- նշեց Բաբուխանյանը։
Վերջին երեք ամսվա ընթացքում Ղարաբաղի հետ շփման գծում Ադրբեջանը երեք դիվերսիոն ակցիա է իրականացրել, որոնց արդյունքում մարդկային զոհեր են եղել: Օգոստոսի 31-ին և սեպտեմբերի 4-ին Ադրբեջանի կողմից կազմակերպված դիվերսիաները ձախողվել են: Ադրբեջանական հետախուզական-դիվերսիոն խմբերը նահանջել են՝ ընդհանուր առմամբ կորցնելով չորս զինծառայող:
Ըստ Բաբուխանյանի՝ Հայաստանը պետք է համաշխարհային հանրությանը ցույց տա, որ Հարավային Կովկասի իրավիճակն ապակայունացնող միակ պետությունը շարունակում է Ադրբեջանը մնալ, որը խանգարում է տարածաշրջանում նորմալ քաղաքական և տնտեսական կայունության հաստատմանը։
Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ. դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:
Դրան հետևեցին Ադրբեջանի ձեռնարկած լայնածավալ ռազմական գործողությունները, որոնք հանգեցրին նրան, որ նրանք կորցրեցին վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:
1994թ. մայիսի 12-ին զինադադարի վերաբերյալ եռակողմ համաձայնագրի կնքումից հետո հակամարտության գոտում դադարեցին ռազմական գործողությունները, որոնց արդյունքում երկու կողմից էլ եղավ շուրջ 25-30 հազար զոհ և մոտ մեկ միլիոն մարդ ստիպված լքեց բնօրրանը:
Հրադադարի ռեժիմ հաստատելու վերաբերյալ համաձայնագիրը մինչև այսօր ուժի մեջ է: 1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան: -0-
