Հրուշակեղեն արտադրող Grand Candy ընկերությունը տեղական շուկայում սեփական արտադրության թխվածքներ կներկայացնի, շաբաթ օրը լրագրողներին ասաց Grand Candy ընկերության սեփականատեր, ՀՀ Ազգային ժողովի պատգամավոր Կարեն Վարդանյանը։
Ըստ նրա, արդեն համապատասխան արտադրամաս է կառուցվել, և Grand Candy-ին մեկ ամսից յուրահատուկ ոճով և ձևավորմամբ առաջին ապրանքը կներկայացնի շուկայում։
Նա նշեց, որ ընկերությունը ծրագրում է շուկայում թխվածքների բավական լայն տեսականի ներկայացնել, որն ավանդաբար ծանոթ է տեղացի սպառողներին, մասնավորապես՝ «Նապոլեոն», «Կիևսկի», «Փախլավա» տեսակները։
«Նոր ապրանքը կներկայացվի բոլոր խանութներում ընկերության ապրանքանիշով սառնարաններում, ինչ վերաբերում է գներին, ապա այն այդքան էլ ցածր չի լինի, բայց ոչ էլ բարձր՝ կփորձենք գները միջին մակարդակում պահպանել»,- ասաց Վարդանյանը։
Նա նաև հայտնեց, որ ընկերությունը պատրաստում է շոկոլադե կոնֆետների արտադրության նոր խանութ բացել, որի շենքն արդեն գրեթե պատրաստ է։ Ընկերությունը նաև սննդային ապրանքների անվտանգության եվրոպական չափանիշների ներմուծման աշխատանքներ է անցկացրել:
«Grand Candy» ՍՊԸ-ն հիմնադրվել է 2000 թ.-ին՝ Երևանի հրուշակեղենի և մակարոնեղենի ֆաբրիկայի հիման վրա, որը գործարկվել է 1993 թ.-ի: Ընկերությունը Հայաստանում հրուշակեղենի արտադրությամբ զբաղվող խոշորագույն ընկերություններից է, ինչպես նաև Անդրկովկասի միակ ձեռնարկությունն է, որը զբաղվում է կակաոյի հատիկների վերամշակմամբ:-0-
