ԵՐԵՎԱՆ, 10 սեպտեմբերի. /Նովոստի-Արմենիա/. Հայաստանն ու Ռուսաստանը մտադիր են ամրապնդել տնտեսական կապերը, լրագրողներին ասաց ՀՀ-ում ՌԴ արտակարգ և լիազոր դեսպան Վյաչեսլավ Կովալենկոն:
«Դա ոչ միայն մտադրություն է, այլև գործ: Նոր է ավարտվել ՌԴ նախագահ Դմիտրի Մեդվեդևի այցը Հայաստան, ստորագրվել են մի քանի խոշոր համաձայնագրեր», - ասաց ռուս դիվանագետը:
Նրա խոսքերով՝ ամենախոշոր համաձայնագրերից մեկը վերաբերում է Հայաստանում նոր ատոմային բլոկի կառուցմանը: Բացի այդ, կան նախագծեր երկաթուղայի ցանցի զարգացման, Ուրալի ավտոմոբիլային գործարանի հիման վրա ավտոհավաքման ձեռնարկության կառուցման վերաբերյալ, կարիերային նոր մշակումներ, մոլիբդենային նոր կոմբինատի կառուցման ծրագրեր:
Դեսպանը նշեց նաև Հայաստանում ռուսական բիզնեսի մասնակցության սոցիալական բաղկացուցիչի կարևոր նշանակությունը:
«Որքան շատ լինեն խոշոր, ժամանակակից ձեռնարկությունները, այնքան ավելի շատ կլինեն աշխատատեղերը, ավելի քիչ հայեր կմեկնեն հանրապետությունից, նրանք կաշխատեն այստեղ և եկամուտ կբերեն իրենց ընտանիքներին ու պետությանը: Սա բոլոր նախագծերի կարևոր սոցիալական բաղկացուցիչն է», - ասաց Կովալենկոն:
Ռուսական բիզնեսը լայնորեն ներկայացված է հայկական տնտեսությունում՝ զբաղեցնելով առաջատար դիրքեր էներգետիկայի, տրանսպորտի, հեռահաղորդակցության, լեռնահանքային ոլորտներում, բանկային հատվածում:
Հայաստանում գործում են այնպիսի ռուսական ընկերություններ, ինչպիսիք են «Գազպրոմը», ՌԵ-ն, ՄՏՍ-ը, «ՎիմպելԿոմը», ՎՏԲ Բանկը, «Տրոյկա Դիալոգը» և մի շարք այլ խոշորագույն ընկերություններ:-0-
