Ամերիկացի երգիչ և կոմպոզիտոր Դենիել Դեքերը մոտ ժամանակներում կներկայացնի իր նոր խտասկավառակը, որում 13 հայկական երգ է ընդգրկված:
«Նոր սկավառակով ես ցանկանում եմ ոգեշնչել հայի ոգին, և հիշեցնել աշխարհով մեկ սփռված հայերին, որ իրենք շատ բաներով կարող են հպարտանալ, և որ իրենք միայնակ չեն», - հայտարարել է երգիչը հինգշաբթի ՀՀ սփյուռքի նախարար Հրանուշ Հակոբյանի հետ հանդիպման ընթացքում, հաղորդում է ՀՀ սփյուռքի նախարարության մամուլի ծառայությունը:
Իր նոր ձայնասկավառակի վրա երգիչը իր ազգանվան վերջում ավելացրել է հայկական ազգանվան «յան»-ը:
«Ինձ ոգեշնչում է Հայաստանի մշակութային հարստությունը, երաժշտությունը, քրիստոնեական ժառանգությունը և գեղեցիկ բնաշխարհը: Բայց ամենից շատ ես սիրում եմ հայ ժողովրդին: Հայերը շատ փորձությունների ու տառապանքների միջով են անցել, բայց այնուամենայնիվ հայկական ոգին միշտ կանգուն է», - նշել է Դեքերը:
Ողջունելով հյուրին` նախարարը խորին շնորհակալություն է հայտնել Դանիել Դեքերին նրա հայանպաստ գործունեության համար: Նա հայկական երգարվեստի կատարման և տարածման համար Դենիել Դեքերին պարգևատրել է ՀՀ սփյուռքի նախարարության «Կոմիտաս» մեդալով:
Դեքերն արդեն ինը տարի է՝ իր ստեղծագործություններով բարձրաձայնում է Հայոց Ցեղասպանությունը: Երգիչը «Ադանա» երգը թարգմանել է 20 լեզուներով: Ստեղծագործությունը կատարվել է անգամ թուրք երգչի կողմից:
Դեքերը «Արաքս» երգի անզուգական կատարումով օրերս մասնակցեց «Կարոտ» փառատոնին:-0-
