Ստեփանակերտի մասնակցությունը Ղարաբաղի վերաբերյալ բանակցային գործընթացին անհրաժեշտություն է, հինգշաբթի հայտարարեց Հայաստանի ԱԳՆ ղեկավար Էդվարդ Նալբանդյանը, հաղորդում է գերատեսչության մամուլի ծառայությունը։
«Լեռնային Ղարաբաղի անմիջական մասնակցությունը զգալիորեն կնպաստի հիմնախնդրի կարգավորմանը»,- ասաց Նալբանդյանը ԵԱՀԿ Մինսկի խմբի համանախագահներ Բեռնար Ֆասիեի (Ֆրանսիա), Ռոբերտ Բրադկեի (ԱՄՆ), Իգոր Պոպովի (Ռուսաստան) հետ հանդիպման ընթացքում։
Համանախագահները արտգործնախարար Նալբանդյանին ներկայացրեցին նախորդ օրերին Բաքվում և Ստեփանակերտում` Ադրբեջանի և Արցախի իշխանությունների հետ ունեցած իրենց քննարկումների արդյունքները:
Հանդիպման ընթացքում քննարկվեցին ադրբեջանա-ղարաբաղյան շփման գծում տեղի ունեցած սադրանքները և դրանց հնարավոր հետևանքները բանակցային գործընթացի և հակամարտության գոտում իրադրության վրա:
Վերջին գրեթե երեք ամսվա ընթացքում Ադրբեջանը մարդկային զոհերի հանգեցրած դիվերսիոն երեք ակցիա է իրականացրել Ղարաբաղի հետ շփման գծում։ Օգոստոսի 31-ին և սեպտեմբերի 4-ին նախաձեռնած ադրբեջանական դիվերսիաները ձախողվել են։ Ադրբեջանական հետախուզական-դիվերսիոն խմբերը նահանջել են՝ ընդհանուր առմամբ չորս մարդկային զոհ տալով։ -0-
Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ. դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:
Դրան հետևեցին Ադրբեջանի ձեռնարկած լայնածավալ ռազմական գործողությունները, որոնք հանգեցրին նրան, որ նրանք կորցրեցին վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:
1994թ. մայիսի 12-ին զինադադարի վերաբերյալ եռակողմ համաձայնագրի կնքումից հետո հակամարտության գոտում դադարեցին ռազմական գործողությունները, որոնց արդյունքում երկու կողմից էլ եղավ շուրջ 25-30 հազար զոհ և մոտ մեկ միլիոն մարդ ստիպված լքեց բնօրրանը:
Հրադադարի ռեժիմ հաստատելու վերաբերյալ համաձայնագիրը մինչև այսօր ուժի մեջ է: 1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան: -0-
