Հայաստանի Զինված ուժերի զինծառայող, 27-ամյա Արթուր Հակոբյանն ինքնասպանություն է գործել, հինգշաբթի «Նովոստի-Արմենիա» գործակալությանը հայտնեցին Հայաստանի պաշտպանության նախարարության հասարակայնության և ԶԼՄ-ների հետ կապերի վարչությունից։
«Սեպտեմբերի 8-ին՝ ժամը 9։30-ին, իրային գույքի պահեստապես, պայմանագրային զինծառայող, կրտսեր սերժանտ Արթուր Ռուբենի Հակոբյանը, նախնական տվյալներով, պահեստում ինքն իրեն մահացու հրազենային գնդակային վիրավորում է հասցրել գլխի հատվածում»,- ասվում է հաղորդագրությունում։
Միջադեպի առնչությամբ քրեական գործ է հարուցվել, ընթանում է նախաքննություն:
Սա Հայաստանի ԶՈՒ-ում արձանագրված ինքնասպանության երկրորդ դեպքն է։ Հուլիսի 27-ին լեյտենանտ Արտակ Նազարյանը ՀՀ Տավուշի մարզի Չինարի գյուղի մերձակայքում գտնվող մարտական հենակետում մահացու վնասվածք էր ստացել: Պաշտպանության նախարարության տվյալների համաձայն՝ հրաձգային դասակի հրամանատար, հենակետի ավագ, լեյտենանտ 31-ամյա Արտակ Նազարյանն իրեն ամրակցված մարտական զենքից ինքն իրեն հասցրել է հրազենային մահացու վիրավորում: Չորս մարդ է ձերբակալվել Նազարյանին ինքնասպանության հասցնելու փաստով հարուցված քրեական գործի շրջանակներում։
Հայաստանի պաշտպանության նախարարության հաղորդագրությունների համաձայն՝ ամռանը զինվորական մասերում մի քանի միջադեպեր են տեղի ունեցել, այդ թվում՝ կապված զինծառայողների սպանությունների և ինքնասպանությունների հետ։ Միջադեպերի հետևանքով բանակում մի շարք զինծառայողներ տարբեր աստիճանի պատասխանատվության են ենթարկվել, չորս մարդ ձերբակալվել է։ -0-
