ԵՐԵՎԱՆ, 8 սեպտեմբերի. /Նովոստի-Արմենիա/. «Կարոտ» միջազգային փառատոնի կազմակերպիչները հույս ունեն, որ հայկական բիզնեսն առավել ակտիվ մասնակցություն կունենա ապագա փառատոների ֆինանսավորման գործում, չորեքշաբթի «Նովոստի» միջազգային մամուլի կենտրոնում ասաց Հայկական մշակույթի զարգացման հիմնադրամի նախագահ, «Կարոտ» փառատոնի նախագահ Մեցո Իգիթյանը։
Այս տարի «Կարոտ» միջազգային երրորդ փառատոնն առաջին անգամ անցկացվել է Հայաստանում և Լեռնային Ղարաբաղում։ Նախորդ երկու փառատոները կազմակերպվել են Մոսկվայում։
«Մենք դեռ չենք որոշել, թե որտեղ կանցկացվի «Կարոտ»-ը մյուս տարի։ Հավանաբար, դա կորոշվի մեկ ամսվա ընթացքում։ Հնարավոր է, որ փառատոնը երկու մասի բաժանվի՝ մոսկովյան և հայկական։ Եթե մենք որոշենք ևս մեկ անգամ «Կարոտ» անցկացնել Հայաստանում, ցանկալի կլիներ, որ հայ գործարարներն առավել ակտիվ լինեին»,- նշեց Իգիթյանը։
Ըստ նրա, հայկական ծագում ունեցող ռուս գործարարներն ավանդաբար խոշոր ֆինանսական աջակցություն են ցուցաբերում փառատոնին, երբ այն անցկացվում է Մոսկվայում։
«Մենք կցանկանայինք պարբերաբար փառատոնն անցկացնել Հայաստանում, սակայն դա որոշակի ֆինանսական միջոցներ է պահանջում։ Այս անգամ հիմնական ֆինանսական ծանրաբեռնվածությունն ընկել է փառատոնի կազմակերպիչների վրա։ Բայց Հայաստանում այնպիսի ձեռներեցներ կան, ովքեր կարող էին իրենց թույլ տալ մասնակցել փառատոնի ֆինանսավորմանը, չնայած նրան, որ սա ոչ թե առևտրային, այլ զուտ մարդասիրական նախագիծ է»,- ընդգծեց Հայկական մշակույթի զարգացման հիմնադրամի նախագահը։
ՀՀ մշակույթի նախարարության խորհրդատու Սոնա Հարությունյանն իր հերթին կարծիք հայտնեց, որ հայկական բիզնեսի պասիվության պատճառը տեղեկացված չլինելն է։
«Հնարավոր է, որ նրանց համար «Կարոտ» փառատոնն ինչ-որ լիովին նոր բան է եղել։ Վստահ եմ, որ մյուս անգամ հայ գործարարներն առավել ակտիվ կգտնվեն։ Կարծում եմ, որ կազմակերպիչները նաև պետք է ժամանակին նրանց դիմեն և փառատոնի մասին տեղեկություն ներկայացնեն»,- ավելացրեց Հարությունյանը։
«Կարոտ» փառատոնի բացումը նվիրված էր ԼՂՀ անկախության օրվան, փառատոնի մեկնարկը տրվել է Ստեփանակերտի կենտրոնական մարզադաշտում՝ հայտնի հայ կոմպոզիտոր Արա Գևորգյանի Love Each Other (Սիրիր մերձավորիդ) համերգով։ Սեպտեմբերի 3-7-ը փառատոնը շարունակվել է Երևանում։
Փառատոնի շրջանակներում Հայաստանում էին արվեստի այնպիսի հայտնի գործիչներ, ինչպիսիք են Ժերար Դեպարդյեն, Էմանուիլ Վոտիրգանը, Իգոր Կոստոլևսկին և այլոք։ -0-
