Ամենայն Հայոց Կաթողիկոսը Հովվապետական այցով մեկնել է ԱՄՆ

Ամենայն Հայոց Գարեգին Երկրորդ Կաթողիկոսը նախօրեին Հովվապետական այցով մեկնել է ԱՄՆ, հաղորդում է Մայր Աթոռ Սուրբ Էջմիածնի տեղեկատվական համակարգը:

Այցի շրջանակներում ձեռամբ Վեհափառ Հայրապետի տեղի կունենա Բըրբենքում գտնվող թեմի առաջնորդանիստ Ս. Ղևոնդ նորակառույց եկեղեցու օծման արարողությունը: Սեպտեմբերի 12-ին` Խաչվերացի տոնին, հանդիսապետությամբ Ամենայն Հայոց Կաթողիկոսի, նորաօծ տաճարում կմատուցվի Ս. Պատարագ:

Բացի այդ, սեպտեմբերի 9-ին Ամերիկայի Միացյալ Նահանգների Հայոց Արևելյան թեմում, Բոստոնում, Նորին Սրբությունը կհանդիսապետի Հայոց Ցեղասպանության հիշատակին նվիրված հուշակոթողի օրհնության արարողությունը:

Ամենայն Հայոց Կաթողիկոսին ուղեկցում են Կոտայքի թեմի առաջնորդ Տ. Առաքել եպիսկոպոս Քարամյանը, Գեղարքունյաց թեմի առաջնորդ Տ. Մարկոս եպիսկոպոս Հովհաննիսյանը, Մայր Աթոռի Քրիստոնեական դաստիարակության կենտրոնի տնօրեն Տ. Վարդան աբեղա Նավասարդյանը, Մայր Աթոռի «Էջմիածին» պաշտոնական ամսագրի փոխխմբագիր Տ. Շահե աբեղա Անանյանը, Օտարալեզու մամուլի բաժնի պատասխանատու Տ. Կտրիճ քահանա Դևեջյանը և Տ. Անանիա աբեղա Ծատուրյանն` իբրև գավազանակիր: -0-