ՀՀ կառավարությունն ուրբաթ կայացած նիստի ժամանակ հաստատել է հետախուզման մեջ գտնվող տրանսպորտային միջոցների գրանցման կարգը։
Ինչպես նիստի ժամանակ հայտնեց ՀՀ ոստիկանապետ Ալիք Սարգսյանը, կարգը կկարգավորի տրանսպորտային միջոցների տվյալների գրանցման և տեղեկությունները ՀՀ ոստիկանության Տեղեկատվական կենտրոն ուղարկելու գործընթացը։
ՀՀ ոստիկանության պետը տեղեկացրեց, որ ըստ կարգի տարբերակվում է հաշվառման դրվելու, որոնման մեջ գտնվող մեքենաները հաշվառումից հանելու, ինչպես նաև դրանց մասին տեղեկությունների պահպանման ընթացակարգը։
Որոնման մեջ գտնվող տրանսպորտային միջոցների գրանցման կարգի համաձայն, ամեն նման մեքենայի համար տեղեկատվական որոնողական քարտ է ստեղծվում, որը պարունակում է մեքենայի մասին ողջ տեղեկությունը, որը քրեական հետապնդում իրականացնող մարմինն օրվա ընթացքում ուղղում է Ոստիկանության Տեղեկատվական կենտրոն։ Քարտում պետք է ներառված լինեն մասնավորապես հարուցված քրեական գործի, մակնիշի, մեքենայի պետհամարանիշի, դրա մոդելի, գույնի, տիրոջ մասին տվյալները։
Այն դեպքում, եթե տրանսպորտային միջոցը հաշվառման անցնելուց հետո 10 օրվա ժամկետում դուրս չի հանվում հաշվառումից, ապա այն գրանցվում է ԱՊՀ երկրների միջպետական տեղեկատվական բանկում։ Կառավարական որոշման համաձայն, որոնվող մեքենան հանվում է հաշվառումից այն հայտնաբերելու կամ քրեական գործը դադարեցնելու դեպքում։ Հաշվառումից դուրս եկած մեքենաների տեղեկատվական-որոնողական քարտերը երեք տարի պահպանվում են արխիվում, որից հետո ոչնչացվում են։
Ներկայում Հայաստանում ավելի քան 400 հազար ավտոտրանսպորտային միջոց է հաշվառվում։ 2010թ.-ի առաջին վեց ամիսների ընթացքում Հայաստանում մեքենաների գողության 36 դեպք է գրանցվել, ինչը 5,9 տոկոսով բարձր է 2009թ.-ի նույն ժամանակահատվածի ցուցանիշից։ -0
