ՀՀ պաշտպանության նախարար Սեյրան Օհանյանը չորեքշաբթի Գիտելիքի օրվան նվիրված հանդիսավոր արարողության ընթացքում իր հեղինակած «21-րդ դարի բանակը» գիրքը նվիրել է Երևանի Չեխովի անվան դպրոցին: «Գիրքը գրված է ուղերձների տեսքով և պատմում է Արցախի Պաշտպանության բանակի մասին», - նշեց նախարարը:
Ելույթ ունենալով բարձր դասարանցիների առջև՝ Օհանյանը նշեց, որ այս գիրքը պետք է օգնի աշակերտների ռազմահայրենասիրական ոգու բարձրացման հարցում՝ պատմելով ղարաբաղյան պատերազմի մասին:
Նրա խոսքերով՝ ղարաբաղյան ազգային-ազատագրական պայքարը համախմբել է ողջ հայ ժողովրդին:
Նախարարը նաև նշեց, որ Ղարաղում տեղի ունեցած մարտական գործողությունների ընթացքում փոքր հայկական ջոկատները դիմակայել են ադրբեջանական մի ամբողջ զինվորական մասերին:
«Հայ ժողովուրդն իր պայքարում միշտ հաջողությունների է հասնում, երբ նա համախմբված է», - ասաց նախարարը:
Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ. դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:
Դրան հետևեցին Ադրբեջանի ձեռնարկած լայնածավալ ռազմական գործողությունները, որոնք հանգեցրին նրան, որ նրանք կորցրեցին վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:
1994թ. մայիսի 12-ին զինադադարի վերաբերյալ եռակողմ համաձայնագրի կնքումից հետո հակամարտության գոտում դադարեցին ռազմական գործողությունները, որոնց արդյունքում երկու կողմից էլ եղավ շուրջ 25-30 հազար զոհ և մոտ մեկ միլիոն մարդ ստիպված լքեց բնօրրանը:
Հրադադարի ռեժիմ հաստատելու վերաբերյալ համաձայնագիրը մինչ այսօր ուժի մեջ է: 1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան: -0-
