«Հարավկովկասյան երկաթուղի» ՓԲԸ-ում զարմացել են գյուղատնտեսության նախարար Գերասիմ Ալավերդյանի՝ սահմանային Այրումից մինչև Երևան բեռնափոխադրումների գների աճի մասին հայտարարությունից:
Ալավերդյանը երկուշաբթի մամուլի ասուլիսի ժամանակ նշել է, որ հիմնավորված է համարում Հայաստանում գների բարձրացումը, քանի որ ներկրողները հացահատիկը ներկրում են ավելի բարձր գնով համաշխարհային շուկաներում հացահատիկի ինքնարժեքի բարձրացման և տրանսպորտային ծախսերի պատճառով: Նրա խոսքերով՝ միայն Այրումից դեպի Երևան բեռնափոխադրման գինը 8 դոլարից դարձել է 30 դոլար:
«Անհասկանալի է, թե գյուղատնտեսության նախարարը որտեղից է նման անհիմն թվեր վերցրել... Ընթացիկ եռամսյակում մենք ինդեքսավորել ենք սակագները 2,4 տոկոսով: Այսպիսով, եթե 2010 թ.-ի երկրորդ եռամսյակում սահմանային Այրումից դեպի Երևան մեկ տոննա բեռի տեղափոխման արժեքը կազմել է 5505 դրամ, ապա երրորդ եռամսյակում այն կազմել է 5628 դրամ: Այսպիսով 2010 թ.-ի երրորդ եռամսյակում սակագնի աճը կազմել է 123 դրամ», - «Նովոստի-Արմենիա» գործակալությանը տեղեկացրեց ՀԿԵ հասարակայնության հետ կապերի ծառայության պետ Վահե Դավթյանը:
Դավթյանի խոսքերով՝ 2009 թ.-ին ընկերությունը չի բարձրացրել սակագները՝ թողնելով այն 2008 թ.-ի մակարդակի վրա:
«Այսպիսով, ՀԿԵ-ն ճգնաժամի ամենաթեժ պահին, փաստորեն, աջակցել է հայկական տնտեսությանը, ինչի հետևանքով 2 միլիարդ դրամի կորուստ է կրել: Անհրաժեշտ է հասկանալ, որ ՀԿԵ-ն տնտեսվարող սուբյեկտ է, որի գործունեությունն ուղղված է եկամուտ ստանալուն», - ասաց Դավթյանը: Նրա խոսքերով՝ 2010 թ.-ին բեռնափոխադրումների սակագները ինդեքսավորվել են 9 տոկոսով, ինչը թույլ է տվել մասամբ հավասարակշռել ստեղծված իրավիճակը:
Նրա խոսքերով՝ ՀԿԵ-ն կարգավորում է իր սակագները հաստատված սակագնային քաղաքականության շրջանակներում, որը հրապարակված է ընկերության կայքում և հասանելի է բոլորին:
«Հայկական երկաթուղիների» կոնցեսիոն կառավարումն իրականացնում է «ՀԿԵՈՒ» ՓԲԸ-ն՝ «Ռուսական երկաթուղիներ» ԲԲԸ հարյուրտոկոսանոց դուստրը: ՀԿԵՈՒ-ն իր բալանսում ընդունել ՀԵՈՒ շարժակակազմը 2008թ. հունիսի մեկից՝ «Հայկական երկաթունիներ» պետական ՓԲԸ-ն 30 տարի ժամկետով փոխանցման, կողմերի փոխադարձ համաձայնությամբ ևս 10 տարի երկարացման իրավունքով 2008թ. փետրվարի 13-ի կոնցեսիոն պայմանագրին համապատասխան։--0—
