ԵՐԵՎԱՆ, 1 սեպտեմբերի. /Նովոստի-Արմենիա/. ՀՀ վարչապետ Տիգրան Սարգսյանը ՀՀ ԿԳ նախարար Արմեն Աշոտյանի ուղեկցությամբ այցելել է Երևանի թիվ 29 ավագ դպրոց, որը կրում է հանգուցյալ Անդրանիկ Մարգարյանի անունը:
«Մեր ժամանակ, երբ մենք դպրոց էինք գնում, աշխարհն այլ էր, և աշխարհի պատկերացումն էլ էր այլ: Այսօրվա դպրոցի առջև ծառացած խնդիրները ևս ամբողջովին այլ են: Այսօր մեր հիմնական խնդիրն աճող սերնդին ինքնուրույն մտածել սովորելու հնարավորություն տալն է », - լրագրողներին ասաց վարչապետը:
Նրա խոսքերով՝ այսօր մեծ նշանակության է արժանանում դպրոցները համակարգիչներով զինելը, դպրոցներում նորագույն տեխնոլոգիաների ուսումնասիրումը:
ՀՀ վարչապետը նշեց, որ զրուցել է թիվ 29 դպրոցի ղեկավարության հետ՝ ավելացնելով, որ ուսումնական հաստատությունը վերանորոգման խիստ կարիք ունի:
«Կառավարությունը ՀՀ ԿԳ նախարարության հետ համատեղ մտադիր է Համաշխարհային բանկի ծրագրի շրջանակներում նորոգել մի շարք դպրոցներ և ապահովել համակարգչային դասարաններով», - ասաց Սարգսյանը:
Ավագ դպրոցի համակարգի ներդրման նպատակով ՀԲ-ն 2010-2014 թթ.-ին Հայաստանին տրամադրել է 1,6 միլիոն դոլարի վարկային միջոցներ, ևս 400 հազար դոլար կկազմի բյուջետային ֆինանսավորումը:
Վարչապետը պատմեց նաև իր առաջին դպրոցական օրվա հիշողությունները:
«Ինձ համար այն ժամանակ անհասկանալի էր, թե ինչու են ծնողներս այդպես հուզված: Սակայն նրանց հուզական վիճակը փոխանցվեց ինձ: Ես շատ ուշադիր նայում էին շուրջբոլորս, փորձում էի հասկանալ, թե որտեղ եմ գտնվում», - ասաց նա:
Սարգսյանը շնորհավորեց բոլորին Գիտելիքի օրվա կապակցությամբ՝ նշելով, որ այսօրվա աշխարհը գիտելիքի աշխարհ է, և դպրոցները պետք է այդ իմաստությունը փոխանցեն աշակերտներին:
«Մենք պետք է ներդնենք դա մեր երեխաների գիտակցության մեջ, եթե ցանկանում ենք ունենալ մրցունակ պետություն», - ավելացրեց կառավարության ղեկավարը:-0-
