Հայտնի ֆրանսիացի դերասան Ժերար Դեպարդյեն խոստացել է ներկա գտնվել «Կարոտ» միջազգային 3-րդ փառատոնին, որը տեղի կունենա սեպտեմբերի սկզբին, «Նովոստի» միջազգային մամուլի կենտրոնում հրավիրված ասուլիսի ժամանակ հայտնեց Հայկական մշակույթի զարգացման հիմնադրամի նախագահ, «Կարոտ» փառատոնի նախագահ Մեցո Իգիթյանը:
«Մենք հրավիրել ենք Դեպարդյեին մասնակցելու մեր փառատոնին, և նա խոստացել է գալ: Նա շատ է լսել Հայաստանի մասին, և ցանկություն է հայտնել իրականում ծանոթանալ Հայաստանին և հայկական մշակույթին»,- նշեց փառատոնի նախագահը:
Ըստ Իգիթյանի, բացի այդ, փառատոնի հյուրերի թվում մշակույթի այլ ականավոր գործիչներ կլինեն ողջ աշխարհից:
«Միայն Ռուսաստանից 15 վաստակավոր դերասաններ կժամանեն, որոնց թվում է Ալեքսեյ Պետրենկոն, Էմանուիլ Վիտորգանը, Իգոր Կոստոլևսկին և այլն»,- նշեց նա:
«Կարոտ» միջազգային 3-րդ փառատոնն առաջին անգամ տեղի կունենա Հայաստանում և Լեռնային Ղարաբաղում և կբացվի սեպտեմբերի 2-ին ԼՂՀ մայրաքաղաք Ստեփանակերտում: Նախորդ երկու փառատոներն անցկացվել են Մոսկվայում:
Փառատոնի գլխավոր իրադարձությունը «Կարոտ» մրցանակների հանձնումն է ինչպես Հայաստանի, այնպես էլ աշխարհի մշակույթի, արվեստի, գիտության, սպորտի և այլ ոլորտների ականավոր գործիչներին, հայ ժողովրդի բարեկամներին, այն մարդկանց, ում ստեղծագործությունը կապված է Հայաստանի հետ, ով իր գործունեությամբ ավանդ է ներդրել հայկական և համաշխարհային մշակույթում:
«Կարոտ» մրցանակի են արժանացել Շառլ Ազնավուրը, Սոս Սարգսյանը, Իոսիֆ Կոբզոնը, Անդրեյ Բիտովը, Նիկիտա Սիմոնյանը, Արմեն Ջիգարխանյանը, Շավարշ Կարապետյանը, Վլադիմիր Սպիվակովը, Կոնստանտին Օրբելյանը, Արթուր Աբրահամը:-0-
