«Արմավիա» ընկերությունը չեղյալ է հայտարարում Երևանից Բաթումի և Մոսկվա «ամառային» չվերթերը

Հայաստանի ազգային ավիափոխադրող «Արմավիա» ընկերությունը չեղյալ է հայտարարում երեք «ամառային» ուղիղ չվերթերը Երևանից Բաթումի և Մոսկվայի «Վնուկովո» և «Շերեմետևո» օդանավակայաններ, որոնք իրականացվում էին միայն ամառային ժամանակահատվածում զբոսաշրջային սեզոնում ավելացած պահանջարկի սպասարկման հատուկ նպատակով։

Ինչպես երկուշաբթի «Նովոստի-Արմենիա» գործակալությանը հայտնեցին ավիաընկերության մամուլի ծառայությունից, չեղյալ է հայտարարվել Երևան-Բաթումի-Երևան U8 025/026 չվերթն ընթացիկ տարվա սեպտեմբերի 5-ից 26-ը, ինչպես նաև յոթ մոսկովյան չվերթերից երկուսը՝ Երևան-Մոսկվա (Վնուկովո)-Երևան U8 522/521-ը սեպտեմբերի 9-ից մինչև հոկտեմբերի 30-ը և Երևան-Մոսկվա (Շերեմետևո)-Երևան U8 508/507-ը՝ սեպտեմբերի 11-ից հոկտեմբերի 30-ը։

«Վերոնշյալ չվերթերի իրականացումը Ձմեռ 2010/2011 ժամանակաշրջանում նախատեսված չէ»,- տեղեկացնում է «Արմավիան»։

«Արմավիա» ավիաընկերությունը հայկական ավիացիոն շուկայի առաջատարն է։ Ընկերությունը հիմնադրվել է 1996 թ.-ին։ 2005 թ.-ի հունիսից ավիաընկերության բաժնետոմսերի 100 տոկոսանոց սեփականատերն է MIKA Armenia Trading ընկերության նախագահ Միխայիլ Բաղդասարովը։ 

Այսօր ավիաընկերությունը իր հաճախորդներին առաջարկում է Հայաստանում խոշորագույն չվերթերի ցանցը դեպի Ռուսաստան և ԱՊՀ երկրների, ինչպես նաև Մերձավոր Արևելքի և Եվրոպայի քաղաքներ։

Այսօրվա դրությամբ «Արմավիա»-ի օդանավերի պարկում կա երկուական Airbus 319 և Airbus 320, մեկական Boeing 737-300, Як-42, Ту-134 և Ил-86.—0—