ՀՀ գյուղնախարարին զարմացրել է տեղացի արտադրողների՝ Թուրքիա միս արտահանելու մտադրությունը

ՀՀ գյուղնախարար Գերասիմ Ալավերդյանը զարմացած է մի շարք գործարարների՝ Թուրքիա միս արտահանելու մտադրությունից։

Վերջերս Ստամբուլում «Հնդկաստան-Թուրքիա-ԱՊՀ» համաժողովից հետո  թուրքական ԶԼՄ-ները հղում են արել մի քանի հայկական բիզնեսմենների, ովքեր հայտնել են, որ Հայաստանը պատրաստ է դեպի Թուրքիա միս արտահանել։

«Նման հայտարարությամբ ելույթ են ունենում այն մարդիկ, ովքեր ոչ մի կապ չունեն մսի արտահանման հետ։ Ընդհանուր առմամբ, ես չեմ առարկում, բայց նման նախաձեռնության հիմքում պետք է լուրջ հաշվարկ լինի, այլ ոչ խոսքեր»,- երկուշաբթի լրագրողներին ասաց նախարարը։

Ալավերդյանը հայտնեց, որ տարեկան Հայաստանում 120-130 հազար տոննա միս է արտադրվում, իսկ պահանջարկը շուրջ 150 հազար տոննա է կազմում։ Ըստ նախարարության տվյալների, տարեկան 15 հազար տոննա տավարի, 7-8 հազար տոննա խոզի և 35 տոննա թռչնամիս է մտնում երկիր։

Միաժամանակ նախարարը հայտնեց, որ Հայաստանը շարունակում է ոչխարների արտահանումը։ Այսպիսով, 2009թ.-ին 147 հազար ոչխար է արտահանվել Իրան, իսկ ընթացիկ տարվա հինգ ամիսների ընթացքում՝ 22 հազար գլուխ։

Նա ընդգծեց, որ եթե անցած տարի Հայաստանում ոչխարների գլխաքանակը 511 հազար է կազմել, ապա այս տարի՝ արդեն 919 հազար է։ -0-