Հայաստանը Վենետիկի 54-րդ բիենալեի առավել շատ այցելու ունեցող տարածքում փորձում է ազգային տաղավար տեղադրել, «Նովոստի-Արմենիա» միջազգային մամուլի կենտրոնում հրավիրված ասուլիսի ժամանակ ասաց հայկական տաղավարի կոմիսար Վիկտոր Մնացականյանը։
Վենետիկի 54-րդ բիենալեն մեկնարկում է 2011 թ.-ի հունիսին և կտևի մինչև նոյեմբերի 27-ը՝ «Տիեզերքները տիեզերքում» նշանաբանի ներքո: Հայաստանը Վենետիկի բիենալեին մասնակցում է 1995թ.-ից։
«Մենք ձգտում ենք հայկական տաղավարներ տեղադրել Վենետիկի Արսենալում (Arsenale di Venezia)։ Այդ մասերում տարածքները չափազանց սահմանափակ են, իսկ այդտեղ սեփական տաղավարներ տեղադրելու համար շատ երկրներ են հավակնում, քանի որ դրանք Վենետիկի ամենաշատ այցելու ունեցող վայրերն են»,- ասաց կոմիսարը։
Ըստ նրա, այն ժամանակահատվածում, երբ Վենետիկում կանցկացվի միջոցառումը հինգից մինչև յոթ միլիոն զբոսաշրջիկներ կժամանեն, որոնցից շատերն անմիջապես կայցելեն բիենալե, և այդ առումով շատ կարևոր է ազգային տաղավար տեղադրել առավել հայտնի վայրերում։
Մշակույթի նախարարության ժամանակակից արվեստի վարչության պետ Սոնա Հարությունյանն իր հերթին նշեց, որ մշակույթի նախարար Հասմիկ Պողոսյանը 2007թ.-ի Վենետիկի բիենալեի ժամանակ իտալական կառավարությունից հայկական տաղավարի համար Վենետիկում 16-րդ դարի շենքը վարձակալելու առաջարկ է ստացել։
«Նախարարությունը կարծում է, որ ավելի լավ է չվարձակալել, այլ գնել այդ շենքը, սակայն դեռ բավական միջոցներ չունենք դրա համար։ Դա շատ խոշոր գումար է»,- ասաց Հարությունյանը՝ չճշտելով, թե խոսքը որքան գումարի մասին է։
Վենետիկի բիենալեն հիմնադրվել է 1895 թ.-ին՝ որպես «Վենետիկ քաղաքի միջազգային գեղարվեստական ցուցահանդես»: Առաջին բիենալեին ներկայացվել են 16 երկիր ներկայացնող նկարիչների աշխատանքներ: Բիենալեն շատ շուտով միջազգային հեղինակություն է ձեռք բերել, իսկ երբ Երկրորդ համաշխարհային պատերազմից հետո՝ 1948թ.-ին, վերսկսվեց բիենալեի կանոնավոր անցկացումը, այն դարձավ համընդհանուր միջազգային ավանգարդի հարթակ: 1930-ականներին բիենալեի շրջանակներում հիմնադրվել են երաժշտության, թատրոնի, կինոյի միջազգային փառատոներ, 1975թ.-ին՝ Ճարտարապետության միջազգային ցուցահանդեսը:
Հայաստանը Վենետիկի բիենալեին մասնակցում է 1995թ.-ից: 1995-2009թթ.-ին հայկական տաղավարը ներկայացրել է Հայաստանում Նորարար փորձարարական արվեստի կենտրոնի (ՆՓԱԿ) հիմնադիր Էդուարդ Պալասանյանը:-0-
