Հայաստանն աննախադեպ նախագիծ կներկայացնի Վենետիկի 54-րդ բիենալեին

Հայաստանը Վենետիկի 54-րդ բիենալեին կներկայացնի աննախադեպ, ինքնատիպ նախագիծ, «Նովոստի» միջազգային մամուլի կենտրոնում տեղի ունեցած մամուլի ասուլիսի ժամանակ հայտարարեց հայկական տաղավարի համադրող, արվեստագետ Ռուբեն Արևշատյանը, սակայն չներկայացրեց մանրամասները:

Վենետիկի 54-րդ բիենալեն մեկնարկում է 2011 թ.-ի հունիսի և կտևի մինչև նոյեմբեր՝ «Տիեզերքները տիեզերքում» նշանաբանի ներքո:

«Հայեցակարգը դեռ մշակման փուլում է: Ասեմ միայն, որ այն վերաբերում է Հայաստանի անցյալին, ներկային և ապագային: Սա հայկական ժամանակակից արվեստը ոչ թե մեկուսացված տեսքով, այլ համաշխարհային ժամանակակից արվեստի համատեքստում ներկայացնելու փորձ կլինի», - ասել է համակարգողը:

Նա ընդգծեց, որ տաղավարը կկազմակերպվի այնպիսի ձևով, որ այնտեղ հնարավոր լինի անցկացնել բանավեճեր, քննարկումներ:

Հայկական տաղավարի մեկ այլ համադրող Ռուբեն Ազատյանն իր հերթին նշեց, որ ժամանակակից արվեստի հայ գործիչներն ակտիվ երկխոսության մեջ են այլ երկրներում գտնվող իրենց գործընկերների հետ և ակտիվորեն ինտեգրված են համաշխարհային ժամանակակից արվեստում:

«Մենք հույս ունենք, որ այդ կապերը կօգնեն մեզ կյանքի կոչել մեր տաղավարի գաղափարը», - ասաց Ազատյան:

Վենետիկի բիենալեն հիմնադրվել է 1895 թ.-ին՝ որպես «Վենետիկ քաղաքի միջազգային գեղարվեստական ցուցահանդես»: Առաջին բիենալեին ներկայացվել են 16 երկիր ներկայացնող նկարիչների աշխատանքներ: Բիենալեն շատ շուտով միջազգային հեղինակություն է ձեռք բերել, իսկ երբ Երկրորդ համաշխարհային պատերազմից հետո՝ 1948թ.-ին, վերսկսվեց բիենալեի կանոնավոր անցկացումը, այն դարձավ համընդհանուր միջազգային ավանգարդի հարթակ: 1930-ականներին բիենալեի շրջանակներում հիմնադրվել են երաժշտության, թատրոնի, կինոյի միջազգային փառատոներ, 1975թ.-ին՝ Ճարտարապետության միջազգային ցուցահանդեսը:

Հայաստանը Վենետիկի բիենալեին մասնակցում է 1995թ.-ից: 1995-2009թթ.-ին հայկական տաղավարը ներկայացրել է Հայաստանում Նորարար փորձարարական արվեստի կենտրոնի (ՆՓԱԿ) հիմնադիր Էդուարդ Պալասանյանը:-0- Ա.Թ.