Ղարաբաղում պատերազմ չի լինի. պատգամավոր

Լեռնային Ղարաբաղում նոր պատերազմ չի սկսվի, վստահ է իշխող Հայաստանի Հանրապետական կուսակցության խորհրդարանական խմբակցության ղեկավար Գալուստ Սահակյանը։

«Ղարաբաղում պատերազմ չի սկսվի, եթե անգամ երբևէ սկսվի և եթե մենք մեզ, մեր ուժերի վրա հույս դնենք, ապա մեզ կաջակցեն ոչ միայն ռուսները, այլ նաև ուրիշները։ Հարցն այն է, թե ինչպիսին կլինեն մեր հնարավորությունները, քանի որ ուժեղները միշտ ուժեղներին են աջակցում»,- չորեքշաբթի մամուլի ասուլիսի ժամանակ ասաց Սահակյանը՝ պատասխանելով այն հարցին, թե արդյոք ԼՂՀ-ի դեմ ադրբեջանական ագրեցիայի դեպքում ռուսական ռազմակայանն օգնություն կցուցաբերի։

Օգոստոսի 20-ին Ռուսաստանն ու Հայաստանը արձանագրություն են ստորագրվել Գյումրիի ռուսական ռազմակայանի մասին 1995թ.-ին ստորագրված երկկողմ պայմանագրի մեջ փոփոխություններ կատարելու մասին, որոնք վերաբերում են փաստաթղթի գործողության ժամկետի երկարացմանը: 1995թ.-ին ստորագրված պայմանագրի գործողության ժամկետը 25 տարի էր, այժմ փաստաթուղթը գործելու է 49 տարի:

Ըստ Սահակյանի, ռուսական ռազմակայանը ղարաբաղյան հարցը լուծելու կամ Հայաստանի համար չէ միայն ստեղծված, ռազմակայանը ստեղծվել է ԽՍՀՄ-ի փլուզման ժամանակ և Հայաստանում պահպանվել է երկու երկրների համաձայնագրերի շնորհիվ, ինչը, ըստ նրա, ճիշտ է։

Միաժամանակ պատգամավորն ընդգծեց, որ Հայաստանի համար շահավետ է ռուսական ռազմակայան ունենալ սահմանին, քանի որ չնայած ուժեղ բանակի առկայությանը, հանրապետությունն ուժեղ թշնամի ունի՝ ի դեմս Թուրքիայի։

Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ. դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:

Դրան հետևեցին Ադրբեջանի ձեռնարկած լայնածավալ ռազմական գործողությունները, որոնք հանգեցրին նրան, որ նրանք կորցրեցին վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:

1994թ. մայիսի 12-ին զինադադարի վերաբերյալ եռակողմ համաձայնագրի կնքումից  հետո հակամարտության գոտում դադարեցին ռազմական գործողությունները, որոնց արդյունքում երկու կողմից էլ եղավ շուրջ 25-30 հազար զոհ և մոտ մեկ միլիոն մարդ  ստիպված լքեց բնօրրանը:

Հրադադարի ռեժիմ հաստատելու վերաբերյալ համաձայնագիրը մինչ այսօր ուժի մեջ է: 1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան: -0-