ՀՀ նախագահը ուկրաինացի ժողովրդին խաղաղություն և բարգավաճում է մաղթել

ՀՀ նախագահ Սերժ Սարգսյանը շնորհավորական ուղերձ է հղել Ուկրաինայի նախագահ Վիկտոր Յանուկովիչին՝ Ուկրաինայի ազգային տոնի` Անկախության օրվա կապակցությամբ՝ մաղթելով ուկրաինացի ժողովրդին խաղաղություն և բարգավաճում, հաղորդում է ՀՀ նախագահի մամուլի ծառայությունը:

«Ուկրաինայի ազգային տոնի` Անկախության օրվա կապակցությամբ, ընդունեք իմ անկեղծ շնորհավորանքներն ու բարեմաղթանքները: Վստահ եմ, որ Ձեր ղեկավարությամբ իրականացվող` պետականաշինության, տնտեսության եւ սոցիալական ոլորտների վերակազմավորման, միջազգային ասպարեզում երկրի դիրքերի հետագա ամրապնդման ուղեգիծը ծառայում է ուկրաինացի ժողովրդի երկարաժամկետ շահերին, Ուկրաինայի առաջընթաց և դինամիկ զարգացմանը», - նշվում է ՀՀ նախագահի ուղերձում:

Սարգսյանը գոհունակությամբ նշել է, որ այսօր բարեկամական ամուր կապերի վրա հիմված հայ-ուկրաինական հարաբերություններում նկատվում է դրական տեղաշարժ, որն ունակ է ապահովել միջպետական կապերի հետագա խորացումը` հիմնված փոխադարձ աջակցության և հետաքրքրությունների վրա:

«Վստահ եմ, որ մեր միջև ձևավորված վստահելի երկխոսությունն ու փոխըմբռնումը կնպաստեն երկկողմ համագործակցության հետագա ամրապնդմանը, տնտեսական գործընկերության զարգացմանը, մեր երկրների միջև հումանիտար և միջմարզային կապերի ընդլայնմանը: Ցանկանում եմ Ձեզ քաջառողջություն և հաջողություններ, Ուկրաինայի բարեկամ ժողովրդին` խաղաղություն և բարգավաճում», - նշվում է ուղերձում:-0-