ՀԱՊԿ-ն անմասն չի մնա

Եթե Ադրբեջանը զինված հարձակում նախաձեռնի Լեռնային Ղարաբաղի դեմ, ապա ՀԱՊԿ-ը անմասն չի մնա, հայտարարել է ՀԱՊԿ Տեղեկատվական աջակցության միջազգային հասարակական կենտրոնի (ՏԱՄՀԿ) հայկական բաժնի ղեկավար Նվեր Թորոսյանը:

«Իհարկե, ԼՂՀ-ն ՀԱՊԿ անդամ չէ, և հավաքական անվտանգության շուրջ ձեռք բերված պայմանավորվածությունները նրա վրա չեն տարածվում, սակայն Հայաստանի և Լեռնային Ղարաբաղի անվտանգությունը փողկապակցված է, և դժվար է ասել, թե որտեղ է ավարտվում ԼՂՀ-ի անվտանգությունը և սկսվում Հայաստանի անվտանգությունը», - երեքշաբթի մամուլի ասուլիսի ժամանակ ասաց Թորոսյանը:

Նրա խոսքերով՝ Երևանում օգոստոսի 21-22-ն անցկացված ՀԱՊԿ ոչ պաշտոնական գագաթնաժողովը նպատակ ուներ, այդ թվում նաև, զսպել Բավքի ռազմատենչ տրամադրությունները:

Գագաթնաժողովի օրակարգում ներառված էին Ղրղզստանում իրավիճակի կայունացմանն ուղղված ՀԱՊԿ-ի ծրագրած միջոցառումներին և Կազմակերպության շրջանակներում ճգնաժամային արձագանքման արդյունավետ համակարգի ձևավորմանը վերաբերող հարցեր:

Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ. դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:

Դրան հետևեցին Ադրբեջանի ձեռնարկած լայնածավալ ռազմական գործողությունները, որոնք հանգեցրին նրան, որ նրանք կորցրեցին վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:

1994թ. մայիսի 12-ին զինադադարի վերաբերյալ եռակողմ համաձայնագրի կնքումից  հետո հակամարտության գոտում դադարեցին ռազմական գործողությունները, որոնց արդյունքում երկու կողմից էլ եղավ շուրջ 25-30 հազար զոհ և մոտ մեկ միլիոն մարդ  ստիպված լքեց բնօրրանը:

Հրադադարի ռեժիմ հաստատելու վերաբերյալ համաձայնագիրը մինչ այսօր ուժի մեջ է: 1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան: -0-