Կյանքից հեռացել է հայտնի դերասան Վլադիմիր Մսրյանը

Երեքշաբթի կյանքի 73-րդ տարում մահացել է Կինոյի և թատրոնի հայտնի դերասան, Հայաստանի ժողովրդական արտիստ Վլադիմիր Մսրյանը:

Մսրյանն իրեն վատ է զգացել, նրան տեղափոխել են հիվանդանոց, սակայն հիվանդանոցում մահացել է:

Ինչպես տեղեկացրել է Հայաստանի թատերական գործիչների միության նախագահ Հակոբ Ղազանչյանը, Մսրյանը վերջերս վատառողջ էր: Հինգ տարի առաջ նա շատ ծանր վիճակում տեղափոխվել էր հիվանդանոց և սրտի բարդ վիրահատություն տարել: Նախօրեին նրան կրկին տեղափոխել են հիվանդանոց, սակայն արտիստին փրկել չի հաջողվել:

Վլադիմիր Մսրյանը ծնվել է 1938 թ.-ի մարտի 12-ին Վլադիկավկազում: 1958-62 թթ.-ին ուսանել է Երևանի գեղարվեստաթատերական ինստիտուտում: 1963-64 թթ.-ին աշխատել է Պատանի հանդիսատեսի թատրոնում, 1964-66 թթ.-ին՝ Երևանի Ստանիսլավսկու անվան ռուսական դրամատիկական թատրոնում, 1966 թ.-ից՝ Երևանի դրամատիկական թատրոնում, որտեղ փայլել է Համլետի և Հերոստրատի դերերում:

Մսրյանը նկարահանվել է նաև 19 ֆիլմում: Նրա ամենահայտնի ֆիլմը Լեոնիդ Մենակերի «Նիկոլո Պագանինի» ֆիլմն է (1972), որտեղ դերասանը հանդես է եկել գլխավոր հերոսի դերում:-0-