ՀՀ փոխարտգործնախարար Շավարշ Քոչարյանն անթույլատրելի է համարում տարածաշրջանում բաժանարար գծերի առկայությունը:
«Տարածաշրջանում ոչ մեկին հարկավոր չեն բաժանարար գծեր: Դրանք հարկավոր չեն այն պետություններին, որոնք հսկայական գումարներ են ներդրել, օրինակ, էներգակիրների մեջ: Դրանք հարկավոր չեն ոչ արտադրողներին, ոչ բեռներ տեղափոխողներին, ոչ վերջնական սպառողին», - ասել է Քոչարյանը Հայաստանի հանրային հեռուստաընկերությանը տված հարցազրույցում:
Նրա խոսքերով՝ այդ խնդիրը լուծում ունի, և Հայաստանը հանդես է եկել համապատասխան առաջարկներով՝ անելով դա հրապարակավ, և համաշխարհային հանրությունը գիտի և աջակցում է այդ առաջարկներին, որոնք վերաբերում են ինչպես թուրքական, այնպես էլ ադրբեջանական ուղղություններին:
Վերջին երկու տարվա ընթացքում առաջընթաց է նկատվել հայ-թուրքական հարաբերություններում, որը նախաձեռնել է ՀՀ նախագահ Սերժ Սարգսյանի, որի շրջանակներում 2009 թ.-ի հոկտեմբերի 10-ին Հայաստանի և Թուրքիայի ԱԳ նախարարները Ցյուրիխում ստորագրեցին «Դիվանագիտական հարաբերություններ հաստատելու մասին արձանագրությունը» և «Երկկողմ հարաբերությունները զարգացնելու մասին արձանագրությունը»: Սակայն Թուրքիան պարբերաբար տարբեր առիթներով ձգձգում էր արձանագրությունների վավերացման գործընթացը, ինչի հետևանքով Հայաստանը ապրիլին կասեցրեց փաստաթղթերի վավերացման գործընթացը:
Խոսելով ղարաբաղյան խնդրի կարգավորման գործընթացի մասին՝ Քոչարյանը հիշեցրել է, որ ՀՀ նախագահ Սերժ Սարգսյանը բանակցային գործընթացը դյուրացնելու և փոխադարձ վստահություն ապահովելու համար առաջարկեց կողմերի միջև ուժի չկիրառման համաձայնագիր ստորագրել, որը թույլ կտար չեզոքացնել սպառնալիքները և արդյունավետ առաջ շարժվել: Սակայն նրա խոսքերով՝ ադրբեջանական կողմը մերժեց այդ առաջարկը:
Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ. դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:
Դրան հետևեցին Ադրբեջանի ձեռնարկած լայնածավալ ռազմական գործողությունները, որոնք հանգեցրին նրան, որ նրանք կորցրեցին վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:
1994թ. մայիսի 12-ին զինադադարի վերաբերյալ եռակողմ համաձայնագրի կնքումից հետո հակամարտության գոտում դադարեցին ռազմական գործողությունները, որոնց արդյունքում երկու կողմից էլ եղավ շուրջ 25-30 հազար զոհ և մոտ մեկ միլիոն մարդ ստիպված լքեց բնօրրանը:
Հրադադարի ռեժիմ հաստատելու վերաբերյալ համաձայնագիրը մինչ այսօր ուժի մեջ է: 1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան: -0-
