2010թ.-ի առաջին կիսամյակում Հայաստանում 25,8%-ով աճել է ինքնասպանությունների թիվը. վիճակագրություն

Հայաստանում 2010 թվականի հունվար-հունիս ամիսներին 317 ինքնասպանության դեպք և ինքնասպանության փորձ է արձանագրվել, ինչը 25,8 տոկոսով  շատ է նախորդ տարվա նույն ժամանակահատվածի ցուցանիշից, հաղորդում է ՀՀ ազգային վիճակագրական ծառայությունը։

Վիճակագրական տվյալների համաձայն, 138 ինքնասպանության դեպքից ինը գրանցվել է 17-24 տարեկան չափահասների, 24 դեպք՝ 18-29 տարեկան երիտասարդների շրջանում։ Հայաստանում 73 ինքնասպանություն է գրանցվել 30-65 տարեկան անձանց, 32 դեպք՝ 65 տարեկանից բարձր տարեց մարդկանց շրջանում։

Վիճակագրության տվյալները վկայում են, որ 49,2 տոկոս ինքնասպանություն է գրանցվել գործազուրկների, 19,2 տոկոս՝ թոշակառուների, 9,5 տոկոս՝ աշակերտների և ուսանողների, 9,8 տոկոս՝ աշխատող բնակչության շրջանում։

Ընդհանուր առմամբ, ՀՀ ԱՎԾ տվյալների համաձայն, 2010թ.-ի հունվար-հունիս ամիսներին ավելի քան 14,3 հազար մահվան դեպք է գրանցվել՝ 2009թ.-ի նույն ժամանակահատվածի ավելի քան 14,6 հազար դեպքի համեմատ։ -0-