ՀՀ նախագահ Սերժ Սարգսյանը շնորհավորական ուղերձ է հղել հայրենակիցներին՝ Անկախության հռչակագրի ընդունման 20-րդ տարեդարձի առթիվ, հաղորդում է ՀՀ նախագահի մամուլի ծառայությունը:
Նախագահն իր ուղերձում նշել է, որ 1990 թվականի օգոստոսի 23-ը Հայաստանի նորագույն պատմության առանցքային և ուղենշային դրվագներից է: Այն խորհրդանշում է Հայաստանի ժողովրդի և ողջ հայության իղձերի իրականացման սկիզբը և մարմնավորում անկախ պետականության մեր դարավոր ձգտումը:
«Անցած երկու տասնամյակները հստակորեն ցույց տվեցին, որ հռչակագիրը տեղին էր ու ժամանակին, որ նրանում ամրագրված նպատակներն ու գաղափարները կենսունակ էին, և հայության բոլոր հատվածների ջանքերով շարունակում են հետևողականորեն կյանքի կոչվել», - նշվում է ուղերձում:
«Մեր հռչակած ուղեգիծն իրականություն դարձնելը դյուրին չէր, բայց հավատարիմ մնացինք մեր սկզբունքներին և դավանած արժեքներին: Փորձությունները չշեղեցին մեզ քաղաքական ազատության և սեփական ճակատագրի համար պատասխանատվություն ստանձնելու մեր ճանապարհից», - ասել է Սարգսյանը:
Նախագահը հայրենակիցներին մաղթել է խաղաղ երկինք և ստեղծագործ աշխատանք` հանուն երկրի և հանուն ապագա սերունդների, որոնք պետք է վայելեն Անկախության հռչակագրի սերմանած պտուղները:
Հայաստանի Անկախության մասին հռչակագիրն ընդունվել է 1990թ. օգոստոսի 23-ին՝ Գերագույն խորհրդի առաջին նիստի ժամանակ։ Այդ փաստաթղթով Հայաստանի Խորհրդային Սոցիալիստական Հանրապետությունը անվավեր ճանաչվեց և հռչակվեց Հայաստանի Անկախ Հանրապետությունը։
Հայաստանի Գերագույն խորհրդի որոշմամբ, 1991թ. սեպտեմբերի 21-ին հանրաքվե անցկացվեց՝ ԽՍՀՄ կազմից դուրս գալու և անկախ պետականություն հաստատելու վերաբերյալ։ Ընտրական իրավունք ունեցող քաղաքացիների 94,99%-ը կողմ էր քվեարկել:
Երկու օր անց հանրապետության Գերագույն Խորհուրդը Հայաստանը հռչակեց անկախ, ինքնիշխան հանրապետություն։--0—
