Երևանում տեղի է ունեցել ռուս սպաների հիշատակին նվիրված փոստային նամականիշի մարման արարողությունը

ԵՐԵՎԱՆ, 20 օգոստոսի. /Նովոստի-Արմենիա/. Երևանում ուրբաթ տեղի է ունեցել 19-րդ դարի ռուս-թուրքական պատերազմներում զոհված ռուս սպաների հիշատակին նվիրված «Պատվո բլուր» փոստային նամականիշների և գեղաթերթիկի մարման պաշտոնական արարողությունը:

Մարման արարողությանը մասնակցել են Հայաստանի և Ռուսաստանի տրանսպորտի նախարարներ Մանուկ Վարդանյանն ու Իգոր Լևիտինը, «Հայփոստ» ՓԲԸ-ի գլխավոր գործադիր տնօրեն Արման Խաչատուրյանը և ՀՀ-ում ՌԴ դեսպանատն խորհրդական-դեսպանորդ Սերգեյ Օվերչենկոն:

Նամականիշի վրա պատկերված է Նիկոլայ Լուսավորիչ Հրաշագործի ժամատուն-մատուռն ու Կարսի բերդի գրավմանը մասնակցած ռուս զինվորների հուշարձանը: Գեղաթերթիկի վրա պատկերված են «Կարսի բերդի գրավումը. Բանալիների փոխանցումը» փորագրության և ռուս-թուրքական արշավների ժամանակ ռուսական զորքերի առաջխաղացման քարտեզի հատվածներ:

Նամականիշի անվանական արժեքն է 350 դրամ (մոտավորապես 1 դոլար), տպաքանակը՝ 40000, իսկ գեղաթերթիկի անվանական արժեքը՝ 650 դրամ, (մոտավորապես 1,77 դոլար), տպաքանակը՝ 30000:

Միջոցառման ընթացքում կողմերն ընդգծել են Գյումրիում «Պատվո բլուր» հուշահամալիրի բացման արարողության կապակցությամբ նամականիշի մարման կարևորությունն ու խորհրդանշական լինելը:

«Պատվո բլուր» հուշահամալիրը հիմնադրվել է XIX դարի ռուս-թուրքական պատերազմների ընթացքում զոհված ռուսական բանակի 156 սպաների մարմինների ամփոփման վայրում: Հուշահամալիրի բացման պաշտոնական արարողությունը տեղի կունենա ուրբաթ Հայաստանի նախագահ Սերժ Սարգսյանի և Երևանում պաշտոնական այցով գտնվող ՌԴ նախագահ Դմիտրի Մեդվեդևի մասնակցությամբ:-0-