Մեդվեդևն օրինակելի է համարել հայ-ռուսական հարաբերությունները

ՌԴ նախագահ Դմիտրի Մեդվեդևը օրինակելի է համարում հայ-ռուսական հարաբերությունները:

«Ռուս-հայկական հարաբերություններն ինչպես երկկողմ, այնպես էլ ՀԱՊԿ և ԱՊՀ շրջանակներում` իսկապես շատ սերտ են: Դրանք նույնիսկ կարելի է օրինակելի կոչել, ընդ որում` բոլոր ուղղություններով», -  նախօրեին ՀՀ նախագահ Սերժ Սարգսյանի և նրա տիկնոջ` Ռիտա Սարգսյանի անունից ՌԴ նախագահ Դմիտրի Մեդվեդևի և նրա տիկնոջ` Սվետլանա Մեդվեդևայի պատվին տրված ընթրիքի ժամանակ ասել է ՌԴ նախագահը:

Մեդվեդևը նախօրեին պաշտոնական այցով ժամանել է Հայաստան:

Մեդվեդևը հայ-ռուսական երկխոսությունը համարել է փոխշահավետ՝ նշելով, որ այն իրականացվում է այդ թվում նաև մարզերի և մարդկանց միջև ուղիղ շփումների միջոցով, ինչը հատկապես կարևոր է և գնահատելի:

ՌԴ նախագահի խոսքերով՝ հայ-ռուսական բազմադարյա հարաբերությունների դժվարին պատմական փուլերում մեր ժողովուրդներն ավանդաբար աջակցել են միմյանց և դրա օրինակները շատ են:

Մեդվեդևը նաև նշել է, որ Հայաստանն առաջիններից մեկը օգնության հասնելով Ռուսաստանին անտառային հրդեհների դեմ պայքարում` բարոյական և մարդկային մեծ աջակցություն է ցուցաբերել:

«Ես ուզում եմ անձամբ շնորհակալություն հայտնել Հայաստանի ղեկավարությանը, բոլոր գործընկերներին` մեր հարաբերությունների ամրապնդման, մեր երկրները միմյանց կապող, իսկապես, դաշնակցային հարաբերությունները զարգացնելու անկեղծ ձգտման համար», - նշել է ՌԴ նախագահը:

Մեդվեդևի խոսքերով՝ այս պետական այցը հենց այդ դաշնակցային հարաբերությունների խորհրդանիշն է:

ՌԴ նախագահի պատվին տրվող պետական ճաշին մասնակցել են ՀՀ և ՌԴ նախագահները` իրենց տիկնանց հետ, երկու երկրների պաշտոնական պատվիրակությունների անդամները, հայ-ռուսական հարաբերությունների զարգացման գործում ակտիվ ներդրում ունեցող հասարակական, մշակութային, գործարար շրջանակների ներկայացուցիչներ:-0-