ՀՀ նախագահ Սերժ Սարգսյանը հայ-ռուսական համագործակցությունը համարում է կովկասյան տարածաշրջանի անվտանգության ապահովման ամենակարևոր բաղադրիչներից մեկը:
«Հայ-ռուսական համագործակցությունը կովկասյան տարածաշրջանի անվտանգության և կայունության ապահովման ամենակարևոր բաղադրիչներից է: Դրա ապացույցն են այն կարևոր հարցերը, որոնք մենք առաջիկայում կքննարկենք», - նախօրեին ՌԴ Նախագահ Դմիտրի Մեդվեդևի և նրա տիկնոջ` Սվետլանա Մեդվեդևայի պատվին տրված ընթրիքի ժամանակ ասել է ՀՀ նախագահը, հաղորդում է ՀՀ նախագահի մամուլի ծառայությունը:
Մեդվեդևը նախօրեին պաշտոնական այցով ժամանել է Հայաստան:
ՀՀ նախագահը Մեդվեդևի այցը համարել է նշանակալից: Նրա խոսքերով՝ պետական այց հասկացության էությունը խորհրդանշում է հարաբերությունների այն բարձրագույն մակարդակը, որ կարող է գոյություն ունենալ երկու պետությունների միջև:
«Տվյալ այցը լավագույն հնարավորությունն է մեր հարաբերությունների դինամիկայի դիտարկման, որոշ արդյունքների ամփոփման և մեր դաշնակցային փոխգործակցության նոր նպատակների նախանշման համար», - ասել է ՀՀ նախագահը:
Նրա խոսքերով՝ հայկական կողմը հպարտանում է երկու ժողովուրդների միջև բարեկամական վաղեմի և ամուր կապերով, երկու պետությունների բազմակողմ և հաջող համագործակցությամբ:
Սարգյանն խոսել է նաև հայ-ռուսական համագործակցությանը բնորոշ պատմական բարեկամության, վստահության, արժեքներին նվիրվածության հսկայական ժառանգության կարևորության մասին:
«Ռուսաստանի նախագահի այսօր մեկնարկած պետական այցի առաջին իսկ րոպեից` ես ևս մեկ անգամ զգացի երկուստեք վստահություն, որ մենք կարող ենք առաջ շարժվել: Մենք կարող ենք և եռանդուն կյանքի կկոչենք համատեղ նախանշված ծրագրերը», - ասել է ՀՀ նախագահը:-0-
