ՀՀ կառավարությունը հաստատել է «Մաքուր Հայրենիք» ազգային ծրագիրը

ՀՀ կառավարությունը հինգշաբթի նիստի ժամանակ հաստատել է «Մաքուր Հայրենիք» ազգային ծրագիրը, որը համալիր և հետևողական աշխատանք է նախատեսում՝ հանրապետությունում շրջակա միջավայրի վիճակը բարելավելու նպատակով:

Ինչպես նիստի ժամանակ տեղեկացրեց ՀՀ բնապահպանության փոխնախարար Սիմոն Պապյանը, ծրագիրը մշակվել է միջգերատեսչական աշխատանքային խմբի կողմից, որը ձևավորվել է մեկ տարի առաջ ՀՀ վարչապետի հանձնարարությամբ: Փոխնախարարի խոսքերով՝ ծրագիրը համաձայնությունների և մշակումների երկարատև գործընթաց է անցել:

«Այսօրվա դրությամբ շրջակա միջավայրն անմխիթար վիճակում է՝ ինչպես բնապահպանության, այնպես էլ սանիտարահիգիենիկ նորմերի տեսակետից: Ծրագիրն ուղղված է առաջիկա երեք տարվա ընթացքում Հայաստանում շրջակա միջավայրի վիճակի արմատապես բարելավմանը», - տեղեկացրեց Պապյանը:

Ըստ նրա, ծրագրի իրագործումը նախատեսում է մասնավոր հատվածի, հասարակական կազմակերպությունների հետ պետության ակտիվ համագործակցությունը: Պապյանը տեղեկացրեց, որ ծրագրով 15 միջոցառումների իրագործում է նախատեսվում, որոնցից տասն ուղղված է բացասական հետևանքների վերացմանը, շրջակա միջավայրի մաքրմանը:

«Սակայն եթե ուշադրություն չդարձնենք աղտոտվածության պատճառներին, իրավիճակը չի փոխվի: Այդ պատճառով ծրագրով նախատեսվում է ևս հինգ միջոցառում, որոնք ուղղված են բնության վրա բացասական ազդեցության պատճառների վերացմանը», - նշեց նա:

Փոխնախարարն ավելացրեց, որ, մասնավորապես, նախատեսվում է աշխատանքներ իրականացնել օրենսդրության և ինստիտուցիոնալ դաշտի վերանայման, քարոզարշավների կազմակերպման, բնակչության շրջանում բնապահպանական դաստիարակության ձևավորման ուղղությամբ: Պապյանի խոսքերով՝ ծրագրի հիմնական խնդիրը բնակչության շրջանում շրջակա միջավայրի մաքրության պահպանման կուլտուրայի ձևավորումն է:

ՀՀ վարչապետ Տիգրան Սարգսյանն ավելացրեցլ, որ ծրագիրը հանրապետության համար չափազանց կարևոր նշանակություն ունի:

«Դուք բոլորդ գիտեք, թե ինչպիսի կարևոր խնդիր պետք է լուծենք...Հայաստանում շրջակա միջավայրի մաքրության հարցը բավականին սուր է: Փորձեք ցանկացած ճանապարհով դուրս գալ Երևանից և կտեսնեք տիրող անտանելի իրավիճակը», - ասաց վարչապետը:

Նրա կարծիքով՝ խնդրի լուծման հարցում անհրաժեշտ է համալիր մոտեցում, անհրաժեշտ է բոլոր պետական, տեղական մարմինների, հասարակական կազմակերպությունների և ուսումնական հաստատությունների մասնակցությունը: Սարգսյանը ընդգծեց, որ Հայաստանի շրջակա միջավայրի մաքրությունը պահպանելու համար անհրաժեշտ է փոխել այս հարցի նկատմամբ հասարակության վերաբերմունքը:-0-