Երևանում նախատեսված ՀԱՊԿ գագաթնաժողովը թույլ կտա ՀԱՊԿ պետություններին քաղաքական-անվտանգային գործընթացներին հաղորդել նոր ռազմավարական ազդակ հավաքական անվտանգության ծրագրերի առաջխաղացման հեռանկարների քննարկման միջոցով, ասել է ՀՀ պաշտպանության նախարարության Ազգային ռազմավարական հետազոտությունների ինստիտուտի տնօրեն, քաղաքական գիտությունների դոկտոր, գեներալ-մայոր Հայկ Քոթանջյանը:
ՀԱՊԿ անդամ-պետությունների ղեկավարների երկօրյա ոչ պաշտոնական գագաթնաժողովը կմեկնարկի Երևանում օգոստոսի 20-ին: Գագաթնաժողովի ընթացքում կքննարկվեն տարածաշրջանային անվտանգության խնդիրները, այդ թվում նաև՝ ժամանակակից մարտահրավերներին և սպառնալիքներին հակազդելու ոլորտում ՀԱՊԿ անդամ-երկրների գործակցութունը:
«Ելնելով վերջերս ՀԱՊԿ-ում Հայաստանի նախագահության արդյունավետ փորձից՝ ենթադրում եմ, որ ՀՀ նախագահ Սերժ Սարգսյանը գագաթնաժողովի տան տիրոջ իրավունքով իր գործընկերների հետ քննարկման ժամանակ կօգտվի միջազգային անվտանգության համակարգում ՀԱՊԿ-ի դերի հետագա բարձրացման նոր ուղիներին աջակցելու հնարավորությունից», - ասել է Քոթանջյանը հինգշաբթի «Գոլոս Արմենիի» թերթին տված հարցազրույցում:
Խոսելով ՀԱՊԿ-ի ռազմական բաղկացուցչի զարգացման մասին՝ նա նշել է, որ այն ՀԱՊԿ-ի կատարելագործման կարևորագույն ուղղվածությունն է՝ որպես ժամանակակից ռազմաքաղաքական համակարգի, որն ուղղված է ՀԱՊԿ-ը լավագույն համաշխարհային չափորոշիչներին համապատասխանեցնելուն և այն պահպանելուն:
«Այս փուլում ռազմական բաղկացուցիչը ձևավորվում է բավականին դինամիկ կերպով, նրա զարգացումն արտացոլում է ՀԱՊԿ պետությունների հավաքական անվտանգության ռազմավարական ռազմաքաղաքական գերակայությունները և իրականացվում է կոալիցիոն ռազմական գործընկերության ծրագրի հեռանկարներին համապատասխան», - ասել է նա:
Այս կապակցությամբ ինստիտուտի ղեկավարն ընդգծել է Հայաստանի և Ռուսաստանի նախագահներ Սերժ Սարգսյանի և Դմիտրի Մեդվեդևի ծանրակշիռ ներդրումը, որն արվել է Արագ արձագանքման հավաքական ուժերի ստեղծման գործում, որը ՀԱՊԿ պատասխանատվության գոտում խաղաղության և կայունության պահպանման նոր ու արդյունավետ գործիք է:
Նա նշել է նաև, որ վերջերս տեղի ունեցած ԱԱՀՈՒ զարգացման ուղիների քննարկման ժամանակ ՀԱՊԿ գլխավոր քարտուղար Նիկոլայ Բորդյուժան հանրությանը տեղեկացրել է, որ ՀԱՊԿ-ը ծրագրում է հաջորդ տարի ԱԱՀՈՒ-ի զորավարժություններ անցկացնել:
«Նրա խոսքերով՝ այդ առաջարկի իրատեսությունն ամրագրված է Հայաստանի՝ առաջին հերթին Պաշտպանության նախարարության պատասխանատվությամբ և պարտաստակամությամբ՝ ամեն կերպ աջակցել ԱԱՀՈՒ-ի զորավարժությունների անցկացմանը ժամանակակից ռազմական արվեստի առավել ժամանակակից ձեռքբերումների մակարդակում», -ասել է Քոթանջյանը:
ՀԱՊԿ արագ արձագանքման հավաքական ուժերի ստեղծման մասին համաձայնագիրը ստորագրվել է 2009 թ.-ի փետրվարի 4-ին Կրեմլում կայացած ՀԱՊԿ առաջնորդների հանդիպման արդյունքում։Հավաքական ուժերը կօգտագործվեն ռազմական ագրեսիայի կասեցման, միջազգային ահաբեկչության ու ծայրահեղականության, միջազգային կազմակերպված հանցավորության, թմրանյութերի շրջանառության դեմ պայքարի հատուկ օպերացիաների անցկացման, ինչպես նաև արտակարգ իրավիճակների հետևանքների վերացման համար։-0-
