Դեռևս 3300 փախստական ընտանիք բնակարանի կարիք ունի. վարչապետ

Չնայած Հայաստանի կառավարության և ՄԱԿ-ի փախստականների գծով գերագույն հանձնակատարի գրասենյակի ջանքերի արդյունքում լուծում են ստանում փախստականների բնակարանային խնդիրները, բայց դեռևս 3300 փախստական ընտանիք բնակարանի կարիք ունի, չորեքշաբթի ՄԱԿ-ի փախստականների գծով գերագույն հանձնակատարի երևանյան գրասենյակի ղեկավար Դամթյու Դեսալեյնեի հետ հանդիպման ժամանակ ասաց վարչապետ Տիգրան Սարգսյանը։

«ՀՀ վարչապետը բարձր է գնահատել ՄԱԿ-ի կառույցների և Հայաստանի միջև ծավալված համագործակցությունը։ Հայաստանի կառավարության անունից շնորհավորելով նրան նշանակման կապակցությամբ` վարչապետ Տիգրան Սարգսյանը հաջողություն է մաղթել աշխատանքում և համոզմունք հայտնել, որ դա լինելու է նաև Հայաստանի հաջողությունը փախստականների խնդիրների լուծման գործում»,- հաղորդում է կառավարության մամուլի ծառայությունը։

ՄԱԿ-ի փախստականների գծով գերագույն հանձնակատարի երևանյան գրասենյակի ղեկավարը շնորհակալություն է հայտնել  վարչապետին ջերմ ընդունելության և ՄԱԿ-ի հայաստանյան գրասենյակի աշխատանքներին տրված գնահատականների համար։

Հանդիպման ընթացքում կողմերը կարևորել են Հայաստանի կառավարության և ՄԱԿ-ի փախստականների գծով հանձնակատարի գրասենյակի փոխգործակցությունը։ Այդ համատեքստում անդրադարձ է եղել նաև ԼՂՀ-ում փախստականների խնդիրներին։

1988-1992թթ.-ին Հայաստանի պետական միգրացիոն ծառայության տվյալների համաձայն, Ադրբեջանից  հանրապետություն է ժամանել ավելի քան 360 հազար հայ փաստական, ևս շուրջ 140 հազար էթնիկ հայեր գաղթել են ԱՊՀ երկրներ։

Ըստ ՀՀ պետական միգրացիոն ծառայության վերջին տվյալների, Հայաստանում Ադրբեջանից գաղթած շուրջ 313 հազար հայ փախստական է ապրում, որոնցից շուրջ 82 հազարը չափահաս դառնալուն պես Հայաստանի քաղաքացիություն են ստացել։

Միջազգային կազմակերպությունների տվյալների համաձայն, ևս շուրջ 120 հազար հայ փախստական այլ երկրների քաղաքացիություն են ստացել։ -0-